Astana — Qaraǵandy tasjolynda bes kólik soqtyǵysty

QARAǴANDY. KAZINFORM — Aýa raıynyń qolaısyzdyǵyna baılanysty joldyń bir bóligi jabyq bolǵanyna qaramastan, keıbir júrgizýshiler tasjolǵa shyǵyp, tizbekti jol apatyna ushyrady. Abyroı bolǵanda, zardap shekkender joq.

Jol-kólik oqıǵasy 10 naýryz kúni shamamen saǵat 15:00–de respýblıkalyq mańyzy bar Astana — Qaraǵandy — Almaty tas jolynda tirkeldi. Oqys oqıǵa joldyń 250-shaqyrymynda, Qaraǵandy — Aqsý-Aıýly ýchaskesinde, Atameken aýylynyń mańynda bolǵan.

Jol qyzmetteriniń málimetinshe, soqtyǵys saldarynan eshkim zardap shekpegen.

Aıta ketý kerek, atalǵan jol bóligi aýa raıynyń kúrt nasharlaýyna baılanysty saǵat 10:40–ta jabylǵan bolatyn. Óńirde qalyń qar jaýyp, boran soǵyp, jel kúsheıip, kóriný qashyqtyǵy aıtarlyqtaı tómendegen.

Engizilgen shekteýlerge qaramastan, birneshe avtokólik júrgizýshisi tyıymdy elemeı, jabyq jolǵa shyqqan. Sonyń saldarynan jol-kólik oqıǵasy bolǵan.

Oqıǵa ornyna jol qyzmetiniń mamandary jetken kezde júrgizýshilerdiń eshqaısysy bolmaǵan. Sonymen qatar, keıbir kólikterde memlekettik tirkeý nómirlik belgileri bolmaǵany anyqtalǵan.
Qazirgi ýaqytta joldyń osy bóliginde qozǵalys qaýipsizdigin qamtamasyz etý jumystary jalǵasyp jatyr. Joldy tazartý jáne apat saldaryn joıý úshin jol qyzmetteriniń 15 arnaıy tehnıkasy jumyldyrylǵan.

Jol qyzmetiniń mamandary júrgizýshilerdi, ásirese qolaısyz aýa raıy kezinde, qozǵalysqa engizilgen shekteýlerdi qatań saqtaýǵa taǵy da shaqyrdy.

— Jabyq jol ýchaskelerine shyǵý jáne jol qyzmetteriniń eskertýlerin elemeý qaýipsizdikke úlken qater tóndirip, jol-kólik oqıǵalaryna ákelýi múmkin, — dep eske saldy mamandar.

Eske sala keteıik, buǵan deıin Astana — Qaraǵandy tasjolynda boran kezinde jeti kólik soqtyǵysyp, adam qaza tapqany habarlanǵan bolatyn.