Astana – Qaraǵandy – Almaty tasjolyna jańa kameralar ornatyldy
ASTANA.KAZINFORM - Eldegi qozǵalysy eń qarqyndy magıstraldardyń birinde jyldamdyq rejımin baqylaý kúsheıtildi. Qaraǵandy oblysynda qozǵalystyń eki baǵyty boıynsha da jyldamdyqty tirkeıtin jańa avtomatty keshender iske qosyldy.
Respýblıkalyq mańyzy bar Astana – Qaraǵandy (aınalma jol arqyly) – Almaty avtojolynda jyldamdyqty tirkeıtin jańa keshender jumys isteı bastady. Kameralar Balqash qalasynan Saryshaǵan kentine deıingi aralyqta ornatylǵan.
Qaraǵandy oblystyq polıtsııa departamentiniń málimetinshe, qurylǵylar Torańǵalyq jáne Gúlshat eldi mekenderi mańynda arnaıy arkalarǵa ornalastyrylǵan. Bul keshender qozǵalystyń eki baǵyty boıynsha júrip kele jatqan kólikterdiń jyldamdyǵyn avtomatty túrde tirkeıdi. Atalǵan ýchaskede belgilengen jyldamdyq shegi – saǵatyna 110 shaqyrym.
Sonymen qatar qosymsha jyldamdyq ólsheıtin qurylǵy Qaraǵandy qalasynyń ózinde de ornatylady. 6 naýryzdan bastap ol Nazarbaev dańǵyly, 25 mekenjaıynda, №3 gımnazııanyń mańynda jumys isteıdi. Bul jerde jyldamdyq rejımi qatańyraq – saǵatyna 40 shaqyrymnan aspaýy tıis. Mundaı shekteý bilim berý mekemesiniń ornalasýyna jáne mektep oqýshylarynyń qaýipsizdigin qamtamasyz etý qajettiligine baılanysty engizilgen.
Polıtsııa ókilderiniń aıtýynsha, jańa keshenderdi ornatýdyń negizgi maqsaty – jol-kólik oqıǵalarynyń aldyn alý. Avtomattandyrylǵan júıeler táýlik boıy jyldamdyq rejıminiń saqtalýyn baqylaýǵa múmkindik berip, júrgizýshilerdiń tártibin arttyrýǵa yqpal etedi.
Mundaı sharalardyń ózektiligin statıstıka da kórsetip otyr. Osy jyldyń alǵashqy eki aıynyń ózinde Qaraǵandy oblysynda belgilengen jyldamdyqty asyrýǵa baılanysty 34 869 quqyq buzýshylyq tirkelgen.
Polıtseıler júrgizýshilerdi joldaǵy ózgeristerdi eskerip, jol belgilerine muqııat bolýǵa jáne jol qozǵalysy erejelerin qatań saqtaýǵa shaqyrady. Bul tek aıyppuldan qutylýǵa ǵana emes, óńir joldaryndaǵy qaýipsizdikti arttyrýǵa da múmkindik beredi.
Almaty oblysynda ortasha jyldamdyq kameralary ornatylǵanyn habarlaǵan bolatynbyz.
