Astana – Qaraǵandy – Almaty tas jolynda bolǵan jol apatynan úsh adam qaza tapty
QARAǴANDY. KAZINFORM - Qaraǵandy oblysynyń Aqshataý kenti mańyndaǵy respýblıkalyq mańyzy bar tas jol ýchaskesinde úsh adamnyń ómirin qıǵan jol-kólik oqıǵasy tirkeldi. Qaıǵyly jaǵdaıdyń mán-jaıyn tergeýshiler anyqtap jatyr.
18 naýryz kúni Astana – Qaraǵandy – Almaty avtojolynyń Balqash qalasy jaǵynan Qaraǵandy baǵytyna qaraı, Aqshataý kentinen 40 shaqyrym jerde úsh adamnyń ólimine alyp kelgen jol-kólik oqıǵasy boldy.
Aldyn ala málimetterge sáıkes, Chevrolet Cobalt avtokóligin basqarǵan 30 jastaǵy júrgizýshi uzaq burylysta kólikti tizgindeı almaı, saldarynan kólik aýdarylyp ketken.
Jol apaty saldarynan úsh adam — júrgizýshi men onyń eki jolaýshysy qaza tapty. Olardyń barlyǵy oqıǵa ornynda kóz jumdy.
Atalǵan derek boıynsha qylmystyq is qozǵalyp, qajetti saraptama taǵaıyndaldy. Qazirgi ýaqytta sotqa deıingi tergeý amaldary júrgizilip jatyr.
Qaraǵandy oblysy Polıtsııa departamentinde júrgizýshilerdi jol qozǵalysy erejelerin qatań saqtaýǵa, aýa raıy men jol jaǵdaıyn eskerýge, sondaı-aq belgilengen jyldamdyqty asyrmaýǵa shaqyrdy.
Osyǵan deıin Aqtóbede eki kólik soqtyǵysyp, bes adam kóz jumǵanyn habarlaǵan bolatynbyz.
