Astana – Qaraǵandy – Almaty avtojolynyń bir bóligi ýaqytsha jabylady
ASTANA. KAZINFORM – Almaty oblysynda jóndeý-qurylys jumystaryna baılanysty respýblıkalyq mańyzy bar KAZ01 «Astana – Qaraǵandy – Almaty» avtojolynyń bir ýchaskesinde kólik qozǵalysy ýaqytsha shekteledi, dep habarlaıdy «QazAvtoJol».
Shekteý 17-20 tamyz aralyǵynda kún saıyn saǵat 06:00-den 20:00-ge deıin engiziledi.
– Kórsetilgen ýaqytta 1177-shaqyrymnan, ıaǵnı Aqsaı aýylynan 1186-shaqyrymǵa, Jibek Joly aýylyna deıingi ýchaskede barlyq avtokólik túrleriniń qozǵalysy shekteledi, – delingen habarlamada.
Jabyq ýchaskeni «Aqsaı – Baıkent» → «Baıkent – Boraldaı» → «Boraldaı – Jibek Joly» baǵyty arqyly aınalyp ótýge bolady.
Júrgizýshilerge sapar baǵytyn aldyn ala josparlap, ýaqytsha shekteýlerdi eskerý jáne jol belgileriniń talaptaryn saqtaý usynyldy.
Qozǵalysty ýaqytsha shekteý jóndeý-qurylys jumystaryn qaýipsiz ári sapaly júrgizý úshin engizilip otyr.
Aıta keteıik, Soltústik Qazaqstanda joldyń bir bóligi 22 tamyzǵa deıin jabyldy.
