«Astana» kapıtany «Týr de Fransta» top jardy

Alaıda, aldyńǵy eki sport túrinen sońǵy ýaqyttary aqsap jatqan tustarymyzdy kóp jýrnalıster aıta bastady. Osy rette elimizdiń atyn álemdik deńgeıge shyǵaryp júrgen velosportty aıtpaı ketýge bolmaıdy. Sporttyń osy túrinen Sıdneı Olımpıadasynda kúmisten alqa taǵynǵan jerlesimiz Aleksandr Vınokýrov áli kúnge atoılap júr. Endeshe, veloshabandozdarymyzdyń búgingi jetistikteri jóninde sóıleıtin bolsaq...

Frantsııada jyl saıyn dástúrli túrde ótetin áıgili «Týr de Frans» kópkúndik velojarysy keshe óz máresine jetti. Qýanyshymyzǵa oraı, elimizdiń «Astana» komandasynyń jetekshisi ıspan jigiti Alberto Kontador jalpy esep boıynsha bıylǵy jyl qatarynan 3-shi ret jeńimpaz atandy. Jeńis tuǵyryna kóterilgen A. Kontador, sonymen qatar, sary jeıdeniń de ıesi atandy. Elordamyzdyń atyn álemge pash etip jatqan velosıpedshi jigitterdi quttyqtaýǵa komandanyń basty demeýshisi «Samuryq-Qazyna» ulttyq ál-aýqat qorynyń prezıdenti Qaırat Kelimbetov pen Frantsııadaǵy Qazaqstan elshiligi ókilderi jáne birqatar úkimet adamdary bardy.

Bir aı kólemin qamtyǵan aıtýly báseke 20 kezeńnen turdy. Jarystyń sheshýshi sáti bolyp sanalǵan 18-shi «Po - Týrmale asýy» kezeńi baıraqty básekeniń jeńimpazyn anyqtap qoıǵan-dy. Ekinshi orynda turǵan Kontadordyń basty qarsylasy Endı Shlek osy rette baryn saldy. Máre syzyǵy asýdyń bıik núktesinde bolǵandyqtan, bul kezeńniń áldeqaıda qıyn soqqany da ras. 174 shaqyrymdyq qashyqtyqta aýa-raıynyń jańbyrly ári tumandy bolýy da úlken qıyndyqtar keltirdi. Shlek jarys jolynyń sońyna qaraı alǵa ozyp shyqpaqshy bolǵanmen, Kontador básekelesin ózinen uzata qoımady. Aqyrynda márege Shlek birinshi jetti, áıtse de «Astana» kapıtany onymen esh ýaqyt aıyrmasynsyz úzeńgilese keldi. Sóıtip, 18 kezeńnen keıingi qorytyndy boıynsha 8 sekýnd kórsetkishpen ozyp turdy. Al 19-shy kezeńdegi jekeleı sprınterlik jarysta óziniń kapıtandyq sheberligin kórsete bilgen Alberto Lıýksembýrg jigitimen ýaqyt aralyǵyn 39 sekýndqa deıin uzartty. Bul kezeńde shveıtsarııalyq veloshabandoz Fabıan Kanchellara eń úzdik nátıje kórsetti. «Astana» komandasynyń beldi múshesi Aleksandr Vınokýrov 33-shi, al Kontador 35-shi boldy. Óz kórsetkishin joǵarylatpaq bolǵan «SaksoBank» kapıtany bar kúshin sarqysa da bizdiń kapıtannan oza almady. Al keshegi ótken sońǵy kezeń Parıj qalasyna jetýmen aıaqtaldy. Bul jarys jolynda «Astanalyqtar» kapıtannyń upaıy túgel boǵandyqtan erekshe kózge túse qoımady. Jalpy, bıyl, 2010 jylǵy elordalyq velosportshylar toby bıyl 27 adamnan turatyn mynadaı qurammen óner kórsetti, olar: Alberto Kontador, Aleksandr Vınokýrov, Asan Bazaev, Valerıı Dmıtrıev, Aleksandr Dıachenko, Hesýs Ernandes, Maksım Iglınskıı, Roman Kıreev, Dmıtrıı Mýravev, Danıel Navarro, Bolat Raıymbekov, Stıv Morabıto, Sergeı Renev, Mıhael Shar, Aımar Agırre Zýbeldıa, Bendjamın Noval, Andreı Zeıts, Rýben Plaza, Bradıslav Samoılov, Dmıtrıı Fofonov, Maksım Gýrov, Paolo Tıralongo, Alan Devıs, Jan Paolo Karýzo, Enrıko Gasparotto, Djılberto Sımonı, Andreı Kýnıtskıı. Quramany jasaqtardan buryn Qazaqstan velosport federatsııasynyń vıtse-prezıdenti Nıkolaı Proskýrın osyǵan deıingi komandada bolǵan, biraq jarystardan 2 jylǵa shettetilgen Andreı Kashechkınmen kelisimshart jasaspaıtyndyǵyn málimdegen-di. Al Andreıdiń bul kezde merzimi aıaqtalǵan bolatyn. Óz sózinde N. Proskýrın: «Dál qazir komandanyń negizgi tiregi - Maksım Iglınskıı men Asan Bazaev», degen edi.

Toptyq esep qorytyndysy boıynsha «Radıoshak» komandasy jeńimpaz atandy. Aıta keterlik bir jaıt, bul komandanyń kapıtany amerıkalyq Lens Armstrong qazaqstandyq jankúıerlerge jaqsy tanymal. Bir kezderi «Astananyń» jeıdesin kıgen sportshy talaı tabystar ákelgen edi. Endi, mine «Radıoshak» sapynda jarysty aıaqtaǵan Armstrong sonymen birge, sporttyq ǵumyrymen de qosh aıtysty.

Ne desek te, dál qazir velosportta baǵymyz janyp-aq tur. Tek, bir aıtary, top jaryp báıge alatyn shabandozdar ózimizden qashan shyǵar eken degen oı.