Astana kameralyq hory Vengrııada tamasha óner kórsetti
ASTANA.QazAqparat - Astana qalasy ákimdiginiń Memlekettik akademııalyq fılarmonııasynyń kameralyq hory Vengrııada ótken «Budapest International Choral Celebration» halyqaralyq festıvaline qatysty, dep habarlady qalalyq ákimdiktiń baspasóz qyzmetinen.
Festıvalda usynylǵan baǵdarlama, álemdik klassıkanyń týyndylaryn, sondaı-aq Ahmet Jubanov, Erkeǵalı Rahmadıev, Baqytjan Baıqadamov, Abaı ánderi jáne ózge de ulttyq hor óneriniń úzdik týyndylaryn qamtydy. Repertýarda rýhanı mýzyka jáne djaz, klassıka men búgingi kún áýenderi úndesti. Festıvalǵa qatysý úshin qazaqstandyq hor tyńǵylyqty irikteýden ótti. Bedeldi mýzykalyq saıysqa qatysý múmkindigi álem memleketteriniń 12 ujymyna ǵana buıyrdy. Qazaqstandyqtardyń ónerin kórermender asyǵa kútti. Festıval bastalǵanǵa deıin uıymdastyrýshylar majardyń «Tavasziszel» ulttyq ánin qatysýshy hor ujymdaryna oryndatyp, tıisti beıne rolıkti ańdatpa retinde kórsetti. Astanadan barǵan hordyń oryndaýyndaǵy án eń jıi qaralǵan jáne oń baǵa alǵandardyń aldy boldy. Memlekettik akademııalyq fılormonııanyń Kameralyq hory jasaǵan gastroldik sapary avstrııalyq Baden qalasynda ótken jeke baǵdarlamasymen sátti aıaqtaldy. Sheteldik synshylar qazaqstandyq mýzykanttardyń sheberligin joǵary baǵalady. - Astanadan kelgen Memlekettik fılormonııanyń Kameralyq hory Býdapeshttegi halyqaralyq festıvaldiń kórki boldy. Sizder bizdiń júrekterimizdi qýanysh pen baqytqa toltyrdyńyzdar. Keremet kontsert úshin sizderge sheksiz alǵys bildiremiz, - dedi Avstrııa hor assotsıatsııasynyń prezıdenti Volfgang Tsıgler.
