Astana qalasynyń jańa ákimi úleskerlerdiń máselesin túbegeıli sheshpek

ASTANA. QazAqparat – Astana qalasynyń jańa ákimi Jeńis Qasymbek úleskerlermen kezdesti, dep habarlaıdy QazAqparat.

«Úsh kóppáterli turǵyn úı kesheniniń úleskerlerimen kezdestim. Olar – «Future home», «Arystan», «Zere-2» turǵyn úı keshenderi. Bul turǵyn úı keshenderi eń kúrdeli bolyp sanalady. Jalpy alǵanda, munda jyldar boıy 600-den astam úlesker otbasy óz kiltin kútip júr. Máselen «Future home» turǵyn úı kesheniniń qurylysy 2013 jyly bastalǵan. Nysannyń ózi 6 jyl buryn problemaly dep tanyldy. Bul turǵyn úı kesheninde 200-ge jýyq úlesker otbasy bar. Nysannyń daıyndyǵy 40%-dy quraıdy. Osy oraıda eki blokty buzýǵa týra kelgenin aıta ketken jón. Sebebi qurylys jumysyn qaıta bastaý úshin jaramsyz dep tanylǵan bolatyn», - dep jazdy ákim jelidegi paraqshasynda.

Al «Arystan» turǵyn úı kesheninde 450-ge jýyq úlesker otbasy bar.

«Bul kóppáterli turǵyn úı kesheni problemaly qurylystyń iri nysandarynyń biri bolyp sanalady. Ony berý kezinde nysannyń tek 20-30%-y ǵana daıyn bolǵan edi. Turǵyn úı kesheni birneshe bloktan turady, onyń bir bóligi aıaqtaldy – shamamen 270 úleskerge baspana kilti tabystaldy. Qalǵan bloktardy da aıaqtaımyz. Sol sııaqty kezdesýde turǵyndar nóser kárizin salý, jyly aıaldama ornatý, qosymsha avtobýs baǵytyn iske qosý sekildi ózge de máselelerdi kóterdi. Qurylysy uzaqqa sozylǵan taǵy bir nysan – «Zere-2» turǵyn úı kesheni 6 jyl buryn problemaly dep tanyldy. Munda 230 úlesker otbasy óz páterin kútip júr. Nysandy berý kezinde tek shuńqyry qazylǵan kúıde ǵana bolǵan. Qazirgi ýaqytta qurylysy qaıta jandandy, alaıda jumys qarqynyn arttyrý qajet», - dep tolyqtyrda Jeńis Qasymbek.

Ákim osyǵan deıin ákimdik qaladaǵy qurylysy uzaqqa sozylǵan nysandar boıynsha úlken júıeli jumys júrgizgenin. Úlestik qurylysqa tıesili 51 nysannyń ishinde 15-iniń problemasyn sheshý qalǵan. Onyń 7-eýin bıyl aıaqtaýdy josparlaýda.

«Taǵy 8 nysandy (bul 30-dan astam turǵyn úı kesheni) 2023 jyly aıaqtaýdy aldyma mindet etip qoıdym. Biz turaqty negizde qurylysy uzaqqa sozylǵan nysandardyń, aýdandardyń, eldi mekenderdiń turǵyndarymen kezdesip, jaǵdaıdy jiti nazarda ustaımyz. Kezdesý barysynda aıtylǵan problemalardy sheshý máselesin qolǵa aldyq», - dedi qala basshysy.