Astana qalasynyń teatrlary Ortalyq Azııa festıvalinde úzdik atandy
ASTANA. QazAqparat - Astana qalasynyń Q. Qýanyshbaev atyndaǵy memlekettik akademııalyq qazaq mýzykalyq drama teatry jáne «Jastar teatrynyń» ujymy Ortalyq Azııa memleketteriniń VI Halyqaralyq teatrlar festıvalinde jeńimpaz atandy. Festıval qazannyń 24-inen 27-sine deıin Taldyqorǵan qalasynda ótti, oǵan Qazaqstan, Qyrǵyzstan, Tájikstan, Tatarstan jáne Ózbekstannyń úzdik ujymdary qatysty.
Elordalyq qazaq drama teatrynyń akterlary A. Chehovtyń «Shıe baǵy» komedııasynyń jelisi boıynsha qoıylǵan spektakldi kórsetip, Gran-prı ıelendi, dep habarlaıdy Astana qalasynyń mádenıet, muraǵattar jáne qujattama basqarmasynyń baspasóz qyzmetinen.
Spektakldi qoıýshy tanymal teatr jáne kıno rejısseri, «Zolotaıa maska» reseılik ulttyq teatr syılyǵynyń ıegeri - Sergeı Potapov. Basty róldi somdaǵan - «Zolotoı Vıtıaz-2015» halyqaralyq teatr festıvaliniń dıplomanty Aqmaral Tanabaeva, sondaı-aq, sahna tórinde «Qallekı» teatrynyń artısteri, Qazaqstan Respýblıkasynyń eńbek sińirgen qaıratkerleri - Keńes Nurlanov, Qýandyq Qystyqbaev, Nurken Óteýilov, «Daryn» jastar syılyǵynyń ıegeri Syrym Qashkabaev jáne t.b. óner kórsetti. 
Qallekı teatrynyń jeńisi Astanadan barǵan qatysýshylardyń jalǵyz jetistigi emes. Elordalyq «Jastar» teatrynyń ujymy da VI Ortalyq Azııa memleketteriniń halyqaralyq teatr festıvalinde birinshi oryn aldy. Teatr akterlary Shekspırdiń «Asaýǵa tusaý» qoıylymymen (qoıýshy rejısseri - Qazaqstan Respýblıkasynyń eńbek sińirgen qaıratkeri Nurqanat Jaqypbaı) júldege qol jetkizdi.
Aıta keteıik, «Jastar teatry» úshin bul mereıtoılyq maýsym - ujym alǵash ret 10 jyl buryn sahnaǵa shyqqan. «Jastar teatry» mereıtoılyq teatr maýsymyn biraz jeńistermen atap ótti. Teatrdyń shyǵarmashylyq ujymy Aqtóbe qalasynda XXIV Respýblıkalyq drama teatrlarynyń festıvalinde Gran-prı alsa, Belarýs Respýblıkasynda HHI «Belaıa veja» Halyqaralyq teatr festıvalinde Á. Kekilbaevtyń «Shyńǵyshan» áfsanasy «Poetıkalyq áfsanany kórinisti jetkizý» arnaıy syılyǵyna ıe boldy. Ortalyq Azııa memleketteriniń teatrlarynyń festıvalindegi jeńisteri - ujymnyń maýsym bastalǵaly qol jetkizgen úshinshi jetistigi. 
