Astana qalasynyń tarıhyna qatysty 200-den astam biregeı qujattar kórmege qoıyldy
ASTANA. 19 maýsym. QazAqparat - Búgin QR Ulttyq muraǵatynda elordanyń 15 jyldyq mereıtoıyna arnalǵan «Astananyń gúldenýi - Qazaqstannyń gúldenýi» atty qujattyq kórme ekspozıtsııasy ashyldy.
Atalǵan kórmege táýelsiz Qazaqstannyń jańa elordasy - Astana qalasynyń qalyptasýyna qatysty 200-den astam qujat pen fotomaterıaldar usynylǵan.
Ekspozıtsııa «Astana - Qazaqstan Respýblıkasynyń jańa elordasy», «Astana - halyqaralyq oqıǵalardyń ortalyǵy», «Astana - sport qalasy», «Astana týraly foto jáne ǵylymı-tanymal basylymdar», «Astana - festıvaldar qalasy», «EXPO 2017. Astanaǵa qosh keldińizder» degen 6 taqyryp boıynsha ashylyp otyr.
Olardyń ishinde QR Joǵary keńesiniń QR astanasyn aýystyrý jónindegi sheshimi (1994), «Astana týraly» QR Prezıdentiniń Jarlyǵy (1995) jáne Aqmola qalasynyń ataýyn Astana qalasyna ózgertý jónindegi QR Prezıdentiniń Jarlyǵy (1998) syndy asa qundy qujattardy kórýge bolady.
Sharaǵa memlekettik jáne qoǵamdyq qaıratkerler, QR Parlamentiniń depýtaty, tarıhshylar, muraǵat qyzmetkerleri men elorda turǵyndary qatysty.
