Astana qalasynyń prokýratýrasy Qaırat Boranbaevpen protsestik kelisim jasady
Astana qalasynyń prokýratýrasy Q.Boranbaevpen jáne basqa sottalýshylarmen «QazTransGaz» AQ-nyń qarajatyn ıemdenýge qatysty kináni moıyndaý týraly protsestik kelisim jasady. Zań boıynsha mundaı kelisim sottalýshylardyń erkimen, olardyń taǵylǵan aıyppen kelisýimen, dáleldemelerge daý keltirmeýimen, zalaldy moıyndaýy jáne jábirlenýshiniń kelisimimen jasalady. Osy oraıda qala prokýratýrasy sottalýshylardyń kinálaryn tolyq moıyndaýyn jáne 14,5 mlrd teńgeniń zalalyn ótegenin eskerip, jábirlenýshi taraptardyń kelisimimen protsestik kelisim jasaý týraly sheshim qabyldady.
Atalǵan kelisim boıynsha Qaırat Boranbaev jáne onyń sybaılastarynyń jazasy jeńildeı túspek.
«Sottalýshylar jasaǵan qylmystaryn moıyndaǵandyqtan Q. Boranbaev pen R. Nahanovtyń múlkin tárkilep, árqaısyna 6 jyl bas bostandyǵynan aıyrý jazasyn qoldansa, al T. Januzaqty 5 jyl bas bostandyǵynan aıyrý jazasy suraldy. Úsheýi de memlekettik qyzmetti atqarý quqyǵynan ómir boıyna aıyrý jazasynyń taǵaıyndalýymen kelisti. Mundaı jaza mólsheri Qylmystyq kodekstiń 55-babynyń 3-bóliginiń talaptaryna súıenip aıqyndaldy. Oǵan sáıkes is júrgizý kelisimi jasalǵan jaǵdaıda jazanyń merzimi men mólsheri Qylmystyq kodekstiń erekshe bóliginiń tıisti babynda kózdelgennen joǵary merziminiń jartysynan aspaýy tıis»,-delingen prokýratýra taratqan habarlamada.
Sondaı-aq, habarlamada Qylmystyq kodekstiń 189 jáne 218-baptary boıynsha eń joǵary jaza 12 jyldan aspaıtynyn eskere otyryp, sottalýshylarǵa tıisinshe 6 jáne 5 jyldan bas bostandyǵynan aıyrý jazasyn (eń joǵary merzimniń jartysynan aspaıtyn) taǵaıyndaý usynylǵan.
Aqparatta aıtylǵandaı, protsestik kelisimdi qaraý jáne ony bekitý týraly sheshimdi qabyldaý úshin sotqa joldandy.
Buǵan deıin habarlaǵanymyzdaı prokýror Qaırat Boranbaevqa 6 jyl berýdi suraǵan edi.
