«Astana qalasynyń Patalogoanatomııalyq bıýrosy» MQKM-niń bas býhgalteri 5 jylǵa bas bostandyǵynan aıyryldy
ASTANA. Shildeniń 28-i. QazAqparat /Gúlmıra Álıakparova/ - Asa iri kólemde memleket qarajatyn jymqyrǵany úshin «Astana qalasynyń Patalogoanatomııalyq bıýrosy» memlekettik qazynalyq kommýnaldyq mekemesiniń bas býhgalteri barlyq dúnıe-múlki tárkilene otyryp,
5 jylǵa bas bostandyǵynan aıyryldy.
Qylmystyq istegi derekterge sáıkes, 2008 jyldyń sońynda D. Ótegenova atalmysh memlekettik kásiporynǵa bas býhgalter qyzmetine jumysqa ornalasyp, oǵan memlekettik qyzmetterdi júzege asyrýshy ýákiletti tulǵanyń quqyǵy senip tapsyrylǵan. Óz kezeginde ol, qyzmet ókilettigin paıdalanyp, kompıýterlik baǵdarlamaǵa ený kilti arqyly jumysqa ornalasqan ýaqyttan bastap bir jyldyń ishinde óziniń jáne qol astyndaǵy qyzmetkerlerdiń eńbekaqy kártishkelerine 11 mıllıonǵa jýyq teńge aýdaryp, olardy keıin ózi ıemdengen.
Sondaı-aq Ótegenova, osy ýaqyt aralyǵynda aı saıynǵy býhgalterlik esep tirkemesine qasaqana burmalanǵan derekterdi engize otyryp, taǵy 4,5 mıllıon teńgeden astam qarajatty qaltasyna basqan.
Ótegenovanyń kásiporynǵa keltirgen materıaldyq shyǵynynyń jalpy somasy 15 641 145 teńgeni qurady.
Astana qalasy boıynsha Almaty aýdandyq soty azamatshany QR Qylmystyq kodeksiniń 176 baby, 3-shi bóliginiń «b,g» tarmaǵy boıynsha (asa iri kólemde senip tapsyrylǵan qarajatty urlaǵany úshin) barlyq dúnıe múlkin tárkileı otyryp, 5 jylǵa bas bostandyǵynan aıyrdy. Jalpy rejimdegi abaqtyǵa jabylǵan ol, sondaı-aq bostandyqqa shyqqannan keıin úsh jyl býhgalterlik qyzmetpen aınalysý quqyǵynan da aıyryldy.
Sottyń bul úkimimen kelispegen aıyptalýshy, isti joǵary sotta qaıta qaraýdy suraǵan. Biraq onyń ótinishi qanaǵattandyrylmady. Sot sheshimi ózgertilgen joq jáne ol zańdy kúshine endi.
Sondaı-aq Astana prokýratýrasynan málim etkendeı, qazirgi ýaqytta birqatar urlaý faktileri boıynsha Ótegenovanyń ústinen qozǵalǵan taǵy bir is qaralyp jatyr.
