Astana qalasynyń oqýshylary jalpy komandalyq 1-shi oryndy ıelendi
ASTANA. Naýryzdyń 5-i. QazAqparat /Gúlmıra Álıakparova/ - Jalpy bilim beretin pánder boıynsha ǵylymı jobalardyń respýblıkalyq jarysynyń qorytyndysy boıynsha Astana qalasynyń oqýshylary jalpy komandalyq esepte 1-shi oryndy ıelendi. Bul týraly búgin atalmysh jarystyń nátıjesine arnalǵan baspasóz máslıhatynda elordalyq Bilim berý basqarmasynyń bastyǵy Ásıma Bımendına málim etti,
dep habarlaıdy QazAqparat.
Ústimizdegi jylǵy aqpannyń 22-25-i kúnderi aralyǵynda ótken respýblıkalyq jarystyń IV-shi aqtyq kezeńine Astana qalasynyń 18 orta bilim berý mekemesinen 55 oqýshy qatysty. Komıssııa aldynda olar 9 - komandalyq jáne 37 - jeke jobany tanystyryp, qorǵady. Nátıjesinde elordalyq oqýshylar qorjynǵa 33 medal (4 altyn, 11 kúmis, 18 qola) salyp, jalpykomandalyq esepte 1-shi oryndy ıelendi.
Aıta ketetin taǵy bir jáıt, atalmysh jeńimpazdar aldaǵy Biryńǵaı ulttyq testileý kezinde jeńildikterge ıe bolady, al 6 oqýshy búginde Qazaq Ulttyq ýnıversıtetiniń granttaryn alyp ta úlgerdi.
Ǵylymı jobalar jarysy 4 baǵyt boıynsha ótti - ǵylymı-tehnıkalyq progress - ekonomıkalyq ósýdiń negizgi býyny; ekonomıkalyq jáne áleýmettik protsesterdi matematıkalyq modeldeý; taza tabıǵı orta - «Qazaqstan - 2030» strategııasyn iske asyrýdyń negizi jáne Qazaqstannyń tarıhı eskertkishteri jáne bolashaq damýy bar saıahat marshrýttary.
Á.Bımendınanyń aıtýynsha, elordada daryndy oqýshylardyń qarasy jyl sanap artyp keledi. Máselen, ótken jyly 114 mektep qatysýshysy respýblıkalyq jáne halyqaralyq túrli baıqaýlardyń jeńimpazdary men laýreattary atandy. Eger 2004-2005 oqý jylynda Astana qalasynda Biryńǵaı ulttyq testileýdiń ortasha baly - 70,1-ni qurasa, 2008-2009 oqý jylynda ol - 81,5 balǵa kóterildi. Solaı elimizdiń bas qalasynyń túlekteri alty jyl qatarynan eń úzdik nátıjelerdi kórsetip keledi.
