Astana qalasynyń Narkologııalyq dıspanseri jylyna 3 myńǵa jýyq adamǵa kómek kórsetedi - G.Bektaeva
ASTANA. Maýsymnyń 24-i. QazAqparat /Gúlmıra Álıakparova/ - Astana qalasynyń Medıtsınalyq-áleýmettik saýyqtyrý ortalyǵynda (narkologııalyq dıspanser) jylyna 3 myńǵa jýyq adam emdeledi.
Bul týraly búgin Astanada nashaqorlyqtyń aldyn alý jáne jaǵdaıdy turaqtandyrý máselelerine arnalǵan dóńgelek ústelde atalmysh Ortalyqtyń bas dárigeriniń emdeý jumystary boıynsha orynbasary Gaýhar Bektaeva málim etti.
G.Bektaevanyń aıtýynsha, Medıtsınalyq-áleýmettik saýyqtyrý ortalyǵy (MÁSO) esirtki men ishimdikke táýeldi naýqastardy emdeıtin Astana qalasyndaǵy jalǵyz ortalyq. Onda jylyna 3 myńǵa jýyq adam medıtsınalyq kómek alady. Onyń ishinde 2 myńǵa jýyǵy óz erkimen keletin bolsa, qalǵandary sot shemimi boıynsha kúshtep jatqyzylady.
«Ortalyqta barlyǵy 17 myńǵa jýyq adam esepte tur, olardyń 3,5 myńnan astamy nashaqorlar. Jas erekshelikteri boıynsha aıtatyn bolsam, olar - 20-25 jas aralyǵyndaǵy jastar», - deıdi ol.
G.Bektaeva sońǵy ýaqytta MÁSO-ǵa kómek surap keletinderdiń arasynda ishimdikke salynǵan orta jastaǵy áıelder jıilep ketkenin aıtady. Az alkogoldi sýsyndardy jıi qoldanyp, maskúnemge aınalyp ketkenderin bilmeı qalǵan jastar da kezdesedi. «Emdelip shyǵyp qaıta túsip jatqandar da bar. Bul qıyn kesel, sebebi oǵan kóptegen faktorlar áser etýi múmkin, birinshiden ol - áleýmettik jaǵdaı», - dedi.
Bas dáriger orynbasarynyń sózine qaraǵanda 2008 ben 2009 jyldyń aıaǵynda respýblıka boıynsha esirtkige táýeldilerdiń sany joǵarylap ketkeni baıqaldy. Qazir bul indet aýyzdyqtalyp, jaǵdaı qaıta turaqtana bastady.
