Astana qalasynyń kedendik baqylaý departamenti qyzmetkerleri kezekten tys attestattaýdyń qorytyndy kezeńine daıyndalýda

ASTANA. 28 qyrkúıek. QazAqparat - Astana qalasynyń kedendik baqylaý departamentinde aımaqtyq attestattaý komıssııasy óz jumysyn bastady.

Onda kontrabandamen kúres jáne jedel-kezekshilik qyzmettiń 55 laýazymdy tulǵasy attestattaýdan ótedi. Bul týraly Astana qalasy kedendik baqylaý departamentiniń baspasóz qyzmeti habarlaıdy.

Joǵaryda atalǵan qyzmetkerler psıhologııalyq turaqtylyq testisin tapsyryp, dene shynyqtyrý, áskerı jáne qyzmettik daıyndyqtardan ótken bolatyn.

Keden organdaryndaǵy kezekten tys attestattaý «QR quqyq qorǵaý organdarynyń qyzmetkerlerin kezekten tys attestattaýdan ótkizý týraly» Qazaqstan Respýblıkasy Prezıdentiniń Jarlyǵyn oryndaý sharalary aıasynda júrgizilip jatyr.

Astana qalasynyń KBD-niń quqyq qorǵaý blogynda 62 qyzmetker attestattaýdan ótýge tıis bolǵan. Olardyń 7-eýi shildede Ortalyq attestattaý komıssııasynan birinshilerdiń qatarynda ótken edi.

Quqyq qorǵaý blogynyń qyzmetkerlerin attestattaýdan ótkizýdiń sheshýshi kezeńi qazan aıynda ótedi. Attestattaý komıssııasy jumysynyń ashyqtyǵyn qamtamasyz etý úshin onyń quramyna BAQ, «Nur Otan» HDP, «Atameken» odaǵy ókilderi men basqa da qoǵamdyq uıymdardyń, keden organdarynyń ardagerleri kirip otyr.