Astana qalasynyń kardıohırýrgııa ortalyǵynan jasandy júrekpen alǵashqy emdelýshi shyqty
ASTANA. 5 jeltoqsan. QazAqparat /Murat Jákeev/ - Astana qalasynyń kardıohırýrgııa ortalyǵynan jasandy júrekpen alǵashqy emdelýshi shyǵaryldy, dep habarlady «Ulttyq medıtsınalyq holdıng» AQ-nyń baspasóz qyzmeti.
Medıtsınalyq holdıngte habarlaǵandaı, jasandy júrek ımplantatsııalanǵan emdelýshi 42 jastaǵy Marat Shymbalov boldy. Bul kiside asqynyp ketken tumaýdan keıin kardıomıopatııa - júrek bulshyq etiniń zaqymdalýy damyp ketti. «Júrektiń sol jaq úlpershegi óz qyzmetiniń 20 %-yn ǵana oryndaı alǵan. mamandardyń aıtýynsha, mundaı emdelýshiler ortasha eseppen alǵanda tek 1,5 jyl ǵana ómir súre alady», dep habarlandy baspasóz qyzmetinde.
Ulttyq holdıngte atap ótilgendeı, bul operatsııa turǵyndarǵa tegin medıtsınalyq kómek kórsetý memlekettik kóleminiń aıasynda ótkizildi.
Sanaqqa sáıkes, Qazaqstanda turǵyndarǵa kardıohırýrgııalyq kómekti aımaqtardaǵy 486 oryndyq 20 medıtsınalyq uıym kórsetedi. Bul 2006 jylmen salystyrǵanda 4,5 ese kóp. 2010 jyldyń ózinde-aq 10,5 myń kardıohırýrgııalyq qol suǵýshylyqtar júrgizildi, olardyń 3,5 myńy - ashyq júrekke jasalǵan operatsııalar, al 16,5 myńynan astamy - koronaroangıografııalar, 3 700-den astam aýrý adamǵa qan tamyrlyq stentter qoıyldy. Atqarylyp otyrǵan sharalar qan aınalymy aýrýlarynan bolatyn ólimdi sońǵy 5 jyl ishinde shamamen shırek paıyzǵa tómendetýge múmkindik berdi.
