Astana qalasynyń ІІD arnaıy batalonynyń qyzmetkeri jol apatynan kóz jumdy
ASTANA. 22 shilde.QazAqparat - Astana qalasynyń ІІD arnaıy batalonynyń qyzmetkeri jol apatynan qaza boldy.
Aqmola oblysynyń ІІD-niń baspasóz qyzmetinen habarlaǵandaı, 21 shilde kúni Mıhaılovka aýylynan Arnasaı eldi mekenine qaraı bara jatqan «Mıttsýbısı Padjero Sport» markaly avtokólik aýdarylyp ketken. Avtokóliktiń salonynda úsh adam bolǵan.
21 shilde kúni Arshaly aýdandyq ishki ister bóliminiń kezekshi bólimine Mıhaılovka aýylynyń mańynda bolǵan qaıǵyly oqıǵanyń saldarynan Astana qalasynyń turǵyny 1978 jyly týǵan er adam qaza tapty degen habar túsken.
«Jol apatynyń saldarynan oqıǵa ornynda aýyr jaraqattanǵan Astana qalasynyń ІІD arnaıy batalonynyń 35 jastaǵy qyzmetkeri kóz jumdy. Taǵy bir jolaýshy men avtokólik júrgizýshisi túrli dene jaraqattarymen Arshaly aýdandyq aýrýhanasyna jetkizildi», - delingen baspasóz habarlamasynda.
