Astana qalasynyń fılarmonııasy «Óner álemi» atty eseptik kontsertin beredi
ASTANA. 5 qańtar. QazAqparat - Erteń, 6 qańtar kúni Astana qalalyq memlekettik fılarmonııasynyń shyǵarmashylyq ujymdary men ánshileriniń «Óner álemi» atty esep berý kontserti ótedi.
Kórermenderge tegin qoıylatyn mádenı is-shara barysynda shyǵarmashylyq ujymdar men ánshilerdiń repertýaryndaǵy úzdik týyndylar oryndalady. Astana qalalyq memlekettik fılarmonııasynyń shyǵarmashylyq ujymdary quramyna - Qazaq halyq aspaptary orkestri, Sımfonııalyq orkestr, Ǵazıza Jubanova atyndaǵy Memlekettik ishekti aspaptar kvarteti, «Akademııa solısteri» kameralyq orkestri, «Saryarqa» ulttyq aspaptar ansambli, Úrmeli aspaptar orkestri, Mýzykalyq-shyǵarmashylyq bólim, Klassıkalyq jáne estradalyq vokal bólimi, Dástúrli án bólimi, «Shalqyma» halyq bıi ansambli, Kameralyq hor, Úrmeli aǵash aspaptary kvınteti, «Arman» vokaldy-aspapty ansambli kiredi.
Elordanyń mádenı kelbetin qalyptastyrýda Astana qalalyq memlekettik fılarmonııasynyń qosyp otyrǵan úlesi súbeli. El astanasy aýystyrylǵan 1997 jyldan bastap qalalyq fılarmonııa óz jumysyn qarqyndata tústi. Búgingi tańda elordanyń jetekshi óner ujymyna aınalǵan Memlekettik fılarmonııa - mádenı-aǵartýshylyq mekemelerdiń biri ári biregeıi. Kontserttik birlestikte mádenı ári rýhanı-aǵartýshylyq mıssııany atqaryp kele jatqan 500-den astam kásibı mýzykant eńbek etedi.
