Astana qalasynyń eki akrobatshy qyzy «ORT» telearnasynyń «Mereıli sát» jobasynyń aqtyq synyna jetti
ASTANA. Aqpannyń 13-i. QazAqparat /Gúlmıra Álıakparova/ - Astana qalasynyń eki akrobatshy qyzy, jalpyreseılik «ORT» telearnasyndaǵy mıllıondaǵan kórermenniń qyzyǵa tamashalaıtyn «Mereıli sát» (Mınýta slavy) jobasynyń aqtyq máresine jetti,
dep habarlaıdy QazAqparat.
«2009 jyldyń jazynda habarlandyrý boıynsha irikteý kastıngine qatysa salǵan edik. Ol týraly umytyp ta ketippiz. Bıyl qańtar aıynda kútpegen jerden Máskeýge shaqyrtý aldyq», - deıdi akrobat qyzdar.
Dárııa Ábdýaqasova elordadaǵy S.Seıfýllın atyndaǵy Qazaq agrotehnıkalyq ýnıversıtetiniń 2-shi kýrs stýdenti, al Dana Rysbekova Astanalyq tehnologııa jáne bıznes kolledjinde oqıdy. Ekeýi de Astana tsırkiniń ártisteri.
Dárııa men Dananyń plastıkalyq etıýdtary Aleksandr Maslıakov, Leonıd Parfenov jáne aktrısa Valentına Vasıleva syndy tele-shoý metrlerin qaıran qaldyryp, olardyń oń daýystaryna ıe boldy. Akrobatshy qyzdar aqtyq synǵa ótkenimen, sońǵy daýys kórermenderdiń enshisinde.
Sondyqtan, ústimizdegi aqpan aıynyń sońǵy aptasynda kórsetiletin «Mereıli sát» baǵdarlamasynyń tikeleı efırinen keıin, D. Ábdýaqasova men D. Rysbekovaǵa SMS daýys berýdi umytpaıyq.
