Astana qalasynyń Bas ımamy musylman qaýymdy 23 sáýir kúni ótetin jalpyqalalyq senbilikke jumyla qatysýǵa shaqyrdy

«Imanǵalı Tasmaǵanbetov qala basshysy retinde kindik qalanyń taza da kórikti bolýy úshin bar kúsh-jigerin jumsap keledi. Alla jar bolsyn! Astana ákimdiginiń uıymdastyrýymen 23 sáýir kúni «Biz taza qalany qoldaımy!z» uranymen jalpyqalalyq senbilik ótedi. Musylman adam árdaıym jaqsy iske janashyr bolyp, árbir iste ózgege úlgi-ónege bolýy tıis. Osyǵan oraı barsha astanalyq musylman qaýymdy atalmysh sharaǵa atsalysýǵa shaqyramyz. «Jumyla kótergen júk jeńil», demekshi, ózimiz turatyn qalany, júretin joldar men kóshelerdi jáne otbasymyzben demalatyn oryndarymyzdy tazalaý naýqanyna atsalysaıyq. Alla taǵala tazalyqty jáne taza bolǵandardy jaqsy kóredi. Endeshe, Jaratqanǵa jaqyndatatyn saýapty isten qur qalmaıyq!», - delingen QMDB-nyń naıb múftıi, «Nur Astana» ortalyq meshitiniń Bas ımamy Qalıjan Zańqoevtyń buqaralyq aqparat quraldary arqyly taratqan úndeýinde.

Imamnyń aıtýynsha, aǵash sózi Qasıetti Qurannyń 19 jerinde kelse, egý men osy túbirden shyǵatyn sózder ıláhı kitapta 13 orynda aıtylǵan. Olar jaıynda kóptegen hadıster de bar. Olardyń birqatarynda pendeniń jasaǵan amalyna beriletin saýap aǵashpen beınelengen. «Tipti, qııamet kúni pendege istegen izgi amaldary úshin beriletin syılyqtardyń ishinde aǵashty atap ótýi de teginnen emes. Eger árbir áke balasymen birge bir tal kóshet otyrǵyzyp, aǵash tamyryn tereńge jaıǵansha baǵyp-qaǵyp qaraıtyn bolsa, bala úshin budan asqan qandaı sabaq kerek?! Bala eńbekqorlyq pen bastaǵan isi nátıje bergenshe tózimdilik tanytýǵa úırenedi. Onymen birge, Paıǵambarymyz (s.a.s) Abbas kókesine: «Aǵash otyrǵyzý isin qolǵa al, sebebi aǵash kedeılikke tosqaýyl bolady»,- degen», - deıdi ol.

Imamnyń aıtýynsha, jemis beretin aǵash pen kóshelerge kórik syılap, saıabaqtarda kóleńke berip turatyn jaı aǵash túrlerin otyrǵyzýdyń saýaby bir.

El tanymas úshin qarapaıym sharýanyń kıimin kıip alyp el aralap júrgen patsha, kóshet otyrǵyzyp jatqan aqsaqaldy keziktiredi. Patsha qarııamen amandasyp, oǵan aǵash jemis salǵansha biraz jyl ótetindigin, qart onyń jemisin ózi jeı almaıtyndyǵyn meńzeıdi. Qarııa bolsa: «Ata-babalarymyz otyrǵyzyp ketken aǵashtyń jemisin biz jedik. Al, endi biz de nemerelerimiz úshin jemis aǵashtaryn qaldyrýymyz kerek qoı», - dep jaýap qaıyrdy. Qara basyn emes, bolashaq urpaqty oılaǵan aqsaqalǵa tánti bolǵan patsha oǵan kúmis teńgeli qaltashany syıǵa tartady. Baısaldylyǵynan esh tanbaǵan qarııa: «Balam, men otyrǵyzǵan aǵashtarym jemis bere bastady», - depti jymııa. Qarttyń danalyǵyna súısingen patsha taǵy bir qalta teńge usyndy. Qarııa: «Meniń aǵashtarym jylyna eki ret jemis saldy», - dedi. Sonda nókerleri: «Aldııar taqsyr, bul aradan tez ketip qalmasaq, myna qarııa qaltamyzdaǵy bar qarajatymyzdy qaǵyp alar», - degen eken. Danagóı aqsaqalmen birer ýaqyt qana suhbattasqan patsha óz saraıyna barysymen-aq «árbir bala úshin bir kóshet otyrǵyzylsyn», - dep jarlyq bergen eken.

«Árıne, aǵashty otyrǵyzýmen sharýa bitpeıdi. Budan ári aǵash tamyr jaılap, japyraǵy jaıqalǵansha ol kútimdi qajet etedi. Sondyqtan aǵashtyń túbi men kóleńkesin lastap ketýshige sharıǵatta qatań tyıym salynady. Birde Alla elshisi (s.a.s) sahabalaryna: «Laǵynetke kiriptar etetin eki áreketten saq bolyńdar», - dedi. Sahabalar: «Ýa, Rasýlallah, ol eki jaıt ne?», - dep surady. Ol kisi (s.a.s): «Adamdardyń júretin jolyna nemese aǵash kóleńkesine dáret syndyrý», - dep jaýap berdi», - dep taǵy bir mysal keltirdi Q.Zańqoev.

Bas ımamnyń aıtýynsha, qoqysty arnaıy kúl-qoqys jáshigine salý, avtobýstan túsken soń qoldaǵy jol bıletin jerge tastamaý, ishken sýsyn ydysyn jol jıegine laqtyrmaý - adam balasynyń ımanı tazalyǵynyń kórinisi. ıAǵnı, sizdi bireýdiń kórip turýy shart emes, ony eń bastysy Jaratýshy Alla taǵala kórip tur. «Tazalanǵan jer taza bolmaıdy, tazalyqty saqtaǵan jerde tazalyq bolady», - degen dana sóz osydan qalǵan.