«Astana qalasynyń azyq-túlik beldeýi» memlekettik baǵdarlamasy aıasynda bólingen bıýdjet qarajatyn urlaý faktileri boıynsha 19 qylmystyq is qozǵaldy - Qarjy polıtsııasy
ASTANA. 23 aqpan. QazAqparat - «Astana qalasynyń azyq-túlik beldeýi» memlekettik baǵdarlamasy aıasynda bólingen bıýdjet qarajatyn urlaý faktileri boıynsha 19 qylmystyq is qozǵaldy.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
«2010-2011 jyldary «Astana qalasynyń azyq-túlik beldeýi» memlekettik baǵdarlamasy aıasynda bólingen bıýdjet qarajatyn urlaý faktileri boıynsha 19 qylmystyq is qozǵaldy. Bul baǵdarlama boıynsha Astananyń azyq-túlik qaýipsizdigin qamtamasyz etý maqsatynda aýylsharýashylyq óndirýshilerin jeńildetilgen nesıeleý qarastyrylǵan», - dedi ol.
Máselen, resmı ókildiń aıtýynsha, Aqmola oblysynda 101 mln. teńge mólsherinde nesıeni zańsyz alýǵa járdemdeskeni úshin shartty túrde 5 jylǵa bas bostandyǵynan aıyrý jazasynda Agrarlyq nesıelik korporatsııasy basqarmasy tóraǵasynyń orynbasary B.Tarabaev kesildi.
Sondaı-aq, Tselınograd aýdanynyń soty 6 jylǵa bas bostandyǵynan aıyrýǵa «Tulpar» aýyldyq óndiristik kooperatıviniń basqarma tóraǵasy Sýhambekovti sottady. Ol atalǵan memlekettik baǵdarlama aıasynda Agrarlyq nesıe korporatsııasynan sútti óńdeý boıynsha jabdyqtardy satyp alýǵa 216 mln.teńge nesıe alyp, ony jeke basyna paıdalanǵan.
«Jańabekovke qatysty qylmystyq is sottyń qaraýynda. Ol Agrarlyq nesıe korporatsııasynan 619,2 mln. teńge mólsherinde zańsyz nesıe alǵan dep aıyptalýda. Bul nesıeni alý úshin kepildikke «Zerendınskıı MTS» JShS-niń 1089 qatysýshylarynyń ıeligindegi 38,4 myń gektar kólemindegi jer ýchaskesin zańsyz bergen», - dedi M.Jumanbaı.
