Astana qalasynyń aınalasyna 60 myń gektar orman ekpeleri otyrǵyzyldy
ASTANA. 8 maýsym. QazAqparat - Búgin QR Aýyl sharýashylyǵy mınıstrliginiń Orman jáne ańshylyq sharýashylyǵy komıteti «Astana qalasynyń qala shetindegi aımaǵynda qorǵanysh ekpelerin qurý tehnologııasy» taqyrybynda ǵylymı-praktıkalyq konferentsııa ótkizdi.
Ǵylymı-praktıkalyq keńestiń negizgi maqsaty - Astana qalasynyń qala shetindegi aımaǵynda qorǵanyshtyq orman ekpelerin qurý jáne kútip ustaý tehnologııalaryn jetildirý, olardyń sapasyn, qolaısyz klımattyq jáne orman ósirý jaǵdaılaryna ornyqtylyǵy men tıimdiligin arttyrý. Qazirgi kezeńde ony sheshýdiń joly - ekologııalyq, bıologııalyq, tehnologııalyq jáne uıymdyq is-sharalar keshenin ázirleý jáne qoldaný.
Mınıstrlik baspasóz qyzmetiniń habarlaýynsha, qazirgi kezde Astana qalasy jasyl aımaǵynyń aýmaǵynda 60 myń gektar orman ekpeleri otyrǵyzylǵan. Keleshekte Astana qalasynyń shekarasyna barynsha jaqyn aýmaqta qorǵanyshtyq ekpeler qurylady. Astana qalasynyń qala shetindegi aýdandarynda tuzdaný men sortańdaný dárejesi ártúrli topyraq qabattary keń taraǵan. Orman ekpelerin qurý tehnologııalary problemalaryna, aǵash túrleriniń alýandyǵyn jaqsartýǵa, derbes orman tuqymy bazasyn jaqsartýǵa, aǵash otyrǵyzý materıalynyń sapasyn arttyrýǵa jáne jer óńdeý mashınalarynyń osy zamanǵy keshenin qoldanýǵa aıyryqsha nazar aýdarylady.
Keńestiń qorytyndylary boıynsha Astana qalasynyń jasyl aımaǵyn qurý máseleleri jóninde usynystar qabyldandy.
Semınar-keńestiń jumysyna Búkilreseılik agroormanmelıoratsııa ǵylymı-zertteý ınstıtýty men Ýral memlekettik orman-tehnıkalyq ýnıversıtetiniń ǵalymdary, Qazaqstan tarapynan «Jasyl aımaq» RMK, «Kazgıproleshoz» RMK, «QazOShǴZI» JShS, «Kazagroınnovatsııa» AQ, QazUAÝ, «O. Ospanov atyndaǵy topyraqtaný jáne agrohımııa ınstıtýty» JShS, Astana qalasy ákimdiginiń «Astana ormany» RMQK ókilderi qatysty.
