Astana qalasynyń áýejaıynda JІІB-niń jańa ǵımaraty ashyldy
ASTANA. QazAqparat - QR Іshki ister mınıstri Qalmuhambet Qasymov Astana qalasy halyqaralyq áýejaıyndaǵy Jelilik ishki ister bóliminiń jańa ákimshilik ǵımaratyn saltanatty jaǵdaıda ashty, dep habarlaıdy QR Іshki ister mınıstrliginiń baspasóz qyzmeti.
Jańa ǵımarattyń ashylý saltanatyna Kóliktegi ishki ister departamentiniń basshylary men jeke quramy, sondaı-aq ishki ister organdarynyń ardagerleri qatysty.
Ǵımarat aldyndaǵy saptyq alańda Ulttyq ulan orkestriniń súıemeldeýimen saltanatty sherý ótti. Budan soń jańa ǵımarattyń sımvolıkalyq kilti JІІB-niń basshylyǵyna tapsyryldy.
«Memleket basshysy men Úkimettiń qoldaýynyń nátıjesinde ishki ister organdarynyń materıaldyq-tehnıkalyq jaǵdaıy jyldan jylǵa jaqsaryp keledi. Búgin, mine, kólik polıtsııasy Astana áýejaıynda JІІB-niń barlyq qajettilikterge jaýap bere alatyn jańa qyzmettik baspanasyna qol jetkizip otyr»,- dep málimdedi Іshki ister mınıstri saltanatty sharada.
Qasymov sózinde halyqaralyq «EKSPO-2017» kórmesin ótkizý qarsańynda elordanyń áýejaıy men vokzaldaryna sheteldik qonaqtar jáne elimizdiń turǵyndary kóptep aǵylatynyn atap ótti. Sondyqtan Astanaǵa keletin qonaqtar ózderin jaıly ári qaýipsiz sezinýi úshin bar kúshterin salatyn kólik polıtsııasyna júkteler jaýapkershilik júgi aýyr.
Atap óter jaıt, Astana qalasynyń áýejaıy táýligine 10 myńnan astam joldaýshy qabyldaıdy, al merekelik kúnderi bul kórsetkish eki esege kóbeıedi. Áýejaıǵa kúnine 160 jolaýshy ushaǵy ushyp-qonady. Soǵan baılanysty elimizdiń kólik polıtsııasy quqyq buzýshylyqtyń aldyn alýǵa jáne azamattardyń qaýipsizdigin qamtamasyz etýge aıyryqsha kóńil bóledi.
Mınıstr jańa ǵımaratty aralap, ishki jabdyqtarymen, sondaı-aq kólik polıtsııasynyń qyzmet atqaratyn oryndarymen tanysyp shyqty. Sodan soń Kóliktegi ishki ister departamenti jáne bólimsheleriniń jeke quramy aldaǵy ýaqytta da azamattardyń quqyǵy men múddelerin laıyqty qorǵap, olardyń kóliktegi qaýipsizdigin joǵary deńgeıde qamtamasyz etetinine senim bildirdi.
Jelilik ishki ister bóliminiń jańa ǵımaraty «EKSPO-2017» kórmesine daıyndyq jáne ony ótkizý kezindegi qaýipsizdik pen quqyqtyq tártipti qamtamasyz etý Іs-sharalary jospary aıasynda salyndy.
