Astana qalasynyń Arnaıy prokýrorlar basqarmasynyń aıryqsha nazaryna ilikken 13 qylmystyq istiń 9-y - sybaılas jemqorlyq
ASTANA. 26 qańtar. QazAqparat /Aınur Kenebaeva/ - Astana qalasynyń Arnaıy prokýrorlar basqarmasynyń qaraýynda13 qylmystyq is bolsa,
onyń 8-i prokýrorlardyń aıryqsha nazaryna alynyp, tikeleı tergeý sharasynan ótken. Qylmystyq isterdiń 9-y sybaılas jemqorlyqpen baılanysty bolsa, 2-eýi ekonomıka salasyna qatysty bolyp otyr.
Sybaılas jemqorlyqtyń bir kórinisi retinde Astana qalasy prokýrorynyń kómekshisi, Arnaıy prokýror O. Aıaǵanov saraptama nátıjesin jaǵymdy jaǵynan kórsetýge kelisim berip, sol úshin 100 000 teńge mólsherindegi para alǵan Aýyl sharýashylyǵy mınıstrligi Agroóndiristik keshenindegi memlekettik ınspektsııasy komıteti Egin sharýashylyǵyndaǵy fıtosanıtarlyq qaýipsizdik jáne memlekettik ınspektsııasy basqarmasynyń bas sarapshysy K.Tynyshbaev isin atap ótti. 2010 jyldyń 15 shildesinde Saryarqa aýdandyq № 2 sotynyń úkimimen K.Tynyshbaev kináli dep tanylyp, 4 jylǵa bas bostandyǵynan aıyrylǵan.
Tergeý isi barysynda Arnaıy prokýrorlar Aýyl sharýashylyǵy mınıstrliginiń Balyq sharýashylyǵy komıtetiniń tóraǵasy K.Súleımenov pen Komıtettiń laýazymdy tulǵalary N.Syzdyqov, J.Seralıev syndy azamattardyń teńiz katerlerin satyp alý kezinde, ózderiniń qyzmettik ókilettikterin asyra paıdalanýy saldarynan, memleket múddesine 318 mln. teńge kóleminde iri zalal keltirilgenin anyqtady. Bul oqıǵa 2010 jyldyń 21 jeltoqsanynda oryn alǵan. Jazalaý sharasy retinde atalǵan tulǵalarǵa 500 AEK kólemindegi aıyppul taǵaıyndaldy.
Sonymen qatar O. Aıaǵanov «Astana qalasynyń Turǵyn úı departamenti» MM-niń burynǵy dırektory S.Nogaı, «Páter bıýrosy» AQ-nyń burynǵy bas dırektory M.A.Omarov jáne onyń orynbasary V.M.Kalashnıkovtyń ústinen 270 mln. teńge mólsherdegi bıýdjettik qarajatty ysyrap etkeni úshin qozǵalǵan qylmystyq isterdiń sotta qaralýy aıaqtalýǵa jaqyn.
Aıaǵanovtyń málimdeýinshe, Syrtqy ister mınıstrliginiń Konsýldyq qyzmet departamentiniń burynǵy ekinshi hatshysy A.Jaýtıktiń, Aqmola oblysyna qarasty Tselınograd aýdany aýmaqtyq ýchaskesiniń aǵa oryndaýshysy D.Shyndáýletovtyń Qazaqstan Respýblıkasynyń qyzmettik tólqujatynyń jalǵan 22 danasyn jasaýmen baılanysty bolǵan zańsyz áreketteri áshkerelenip, olarǵa qatysty qozǵalǵan qylmystyq ister aǵymdaǵy jyldyń basynda sotqa tapsyryldy.
«Qazirgi ýaqytta N.Prışıts pen basqa da jalǵan kásipkerlerdi Qazaqstan Respýblıkasy Qylmystyq kodeksiniń 192-babynyń 2-bóliginiń «b» tarmaǵymen aıyptaý boıynsha qylmystyq is tergelýde. Aldyn ala tergeý barysynda Prışıts basshylyq etken toptyń memleketke 559 mln. teńge mólsherinde zalal keltirgeni anyqtaldy» - dedi O. Aıaǵanov.
Arnaıy prokýrorlardyń jumysy barysynda qylmystyq isterdi áshkereleý men jazalaý sharasyn júzege asyrý kezindegi jazanyń bultartpastyǵy prıntsıpiniń saqtalýy ári tolyqqandy qamtamasyz etilýi erekshe nazarǵa alynbaq.
