Astana qalasynyń ákimi salynyp jatqan bilim berý jáne densaýlyq saqtaý nysandaryn aralady (FOTO)
ASTANA. QazAqparat - Búgin Astana qalasynyń ákimi Ádilbek Jaqsybekov salynyp jatqan bilim berý jáne densaýlyq saqtaý nysandaryn aralady, dep habarlady elorda ákimdiginiń baspasóz qyzmeti.
Jyl sońyna deıin «Esil» aýdanynda 200 oryndyq balabaqsha iske qosylady. Nysan jańa turǵyn aýdanynda ornalasqan. Sondaı-aq, elorda ákimi № 26, № 37, № 38 jáne Hýseın ben Talal kóshesinde salynyp jatqan 1200 oryndyq mektepke bardy. Bul mektep óte qolaıly jerde ornalasqan. Jańa bilim ordasy jyl sońynda paıdalanýǵa beriledi.
Bilim berý mekemelerinen bólek, elorda basshysy densaýlyq saqtaý salasyndaǵy nysandarmen de tanysty. Atap aıtqanda, Qabanbaı batyr dańǵyly men №30 kósheniń qıylysynda 250 oryndyq qalalyq balalar juqpaly aýrýlar aýrýhanasy, Temirjolshylar turǵyn alabynda ornalasqan 500 oryndyq týberkýlezge qarsy dıspanser, sonymen birge bir aýysymda 150 kelýshini qabyldaýǵa arnalǵan 250 oryndyq medıtsınalyq-sanıtarlyq ońaltý ortalyǵy iske qosylmaq.
Jańa nysandardy tapsyrýǵa oraı, qala ákimi Astanada týberkýlez aýrýyna shaldyǵý jaǵdaılarynyń tómen ekendigi baıqalatynyn atap ótti. Á. Jaqsybekov jınalys barysynda ınfraqurylymǵa qatysty máselelerge, jańa nysandarǵa aparatyn joldarǵa, jańa bilim berý jáne medıtsınalyq mekemelerdiń kásibı kadrlaryna toqtaldy.
