Astana qalasynyń ákimi qalany energııamen qamtamasyz etetin kásiporyndardyń eń úzdik qyzmetkerlerine páter kiltterin tabys etti
ASTANA. Sáýirdiń 20-sy. QazAqparat /Gúlmıra Álıakparova/ - Astana qalasynyń ákimi Imanǵalı Tasmaǵambetov, qalany energııamen qamtamasyz etetin kásiporyndardyń eń úzdik qyzmetkerlerine páter kiltterin tabys etip, astaryna temir tulpar mingizdi.
Búgin qala ákimdiginde kommýnaldyq qyzmetterdiń qysqy-kúzgi kezeńdegi jumystaryn qorytyndylaýǵa arnalǵan keńes ótti. Onda qala basshysy: «2009-2010 jylǵy kúzgi-qysqy maýsymda atqarylǵan jumystarǵa Elbasy joǵary baǵa berdi. Men de jumystar uıymdasqan túrde atqarylǵandyǵyn atap ótkim keledi. Memleket basshysynyń atynan sizderge alǵysymdy bildiremin. Sebebi qala qystan aman-esen shyǵý úshin tıisti ujymdar qajyrly eńbek etti. Olardyń arasynda ózderiniń kásibı mindetterin abyroımen atqarǵandary bar», - dep atap ótti.
I.Tasmaǵambetov adal eńbegimen kózge túsken jáne baspanaǵa asa zárý «Astana-Energııa» AQ-nyń alty jumyskerine páter kiltterin tabys etse, osy kásiporyn men 1-Jylý elektr ortalyǵynyń, «Qalalyq elektr jelileri» AQ-nyń, «Astana-Jylýtranzıt» AQ-nyń jáne «Astanaqurylysenergo» AQ-nyń bes qyzmetkerine VAZ-2107 avtokólikteriniń kiltterin berdi.
