Astana qalasynyń ákimi Bógenbaı batyr dańǵylynda ornalasqan kópirdiń tolyqtaı iske qosylý saltanatyna qatysty
sp;ASTANA. Qarashanyń 16-sy. QazAqparat /Gúlmıra Álıakparova/ - Búgin Astana qalasynyń ákimi Imanǵalı Tasmaǵambetovtyń qatysýymen Bógenbaı batyr dańǵylynda ornalasqan kópir tolyqtaı iske qosyldy,
dep habarlaıdy QazAqparat.
I.Tasmaǵambetov aldymen qurylys jumystaryn júrgizgen jumysshylarǵa alǵysyn bildirip: «Kópir Astanada avtokólikterdiń emin-erkin júrip-turýyna úlken septigin tıgizetinin jáne alda talaı jol aıyryqtary men kópirler salynatynyn», atap ótti.
Qala ákiminiń aıtýynsha, qurylysy 4 jylǵa sozylǵan kópirdiń jalpy uzyndyǵy 1825 metrdi quraıdy jáne onda 13 myńnan astam metall jáne 8 myńǵa jýyq beton qurylymdary paıdalanylǵan. Sondaı-aq estakadaǵa 1361 dińgek qosymsha qaǵyldy. «Bizdiń qalada mundaı uzyndyqtaǵy kópirler áli salynǵan joq jáne ol táýligine 100 myńnan astam avtokólikti ótkizýge qabiletti», dedi ol.
Bul kópirmen Bógenbaı dańǵyly men Ýálıhanov kósheleri arqyly Aqjol kóshesine, Pavlodar kúre jolyna jáne Aǵash zaýyty shaǵynaýdanyna túsýge bolady. Kólik-jol aıyryǵy jobasyn júzege asyrý aıasynda bas merdiger «Djeılan Lımıted» JShS temir jol jáne Ýgolnyı kóshesi arqyly ótetin uzyndyǵy 138 jáne 78 metr bolatyn temirbetondy jol ótkelderin, Bógenbaı dańǵyly men Ýgolnyı kósheleriniń qıylysyna jol aıyryǵyn saldy. Sondaı-aq 1825 metr ýchaskedegi jol jabyndaryna qaıta jóndeý jumystaryn júrgizdi.
Aıta keteıik, túrik kompanııasy «Djeılan Lımıted» JShS 2006 jylǵy aqpannyń 6-da memlekettik satyp alýlar aıasynda jasalǵan kelisimshartqa sáıkes jurt arasyndy «búkir kópir» atalyp ketken osy nysandy 2008 jylǵy tamyzdyń 20-na deıin paıdalanýǵa berýi tıis bolatyn. Alaıda qurylys barysynda bas merdigerdiń jobalyq qujattarynda nysannyń sapasyna áser etetin kemshilikter anyqtalyp, qurylys toqtatyldy. Sot organdarynyń aralasýymen 2008 jyldyń qarashasynda «Djeılan Lımıted» JShS-ǵa kelesi jyly kópir qurylysyn tolyǵymen aıaqtaý mindeti júkteldi. Al 2009 jyldyń shildesinde estakadanyń sol jaq bóligi iske qosylǵan bolatyn.
