Astana qalasyndaǵy óner mektebi jańa oqý jylyn bastady
ASTANA. 4 qyrkúıek. QazAqparat - Keshe Astana qalasyndaǵy №2 óner mektebinde jańa oqý jylynyń bastalýyna oraı saltanatty mádenı is-shara bolyp ótti.
№2 óner mektebiniń dırektory Gúlmıra Jankeldiqyzy ujymnyń atqarǵan qyzmeti men aldaǵy mindetteri týraly aıtyp ótti. Óner mektebiniń óz túlekterin qanattandyra bastaǵanyna tórt jyl boldy. 22 túlek memlekettik grant boıynsha óner jolyn qýyp, joǵary oqý oryndaryna tústi. Sonyń bári ustazdar qaýymy úshin úlken nátıje.
«Al bıyl birinshi synypqa 110 oqýshy qabyldanyp otyr. Árıne, olar tamyz aıynda qabyldaý komıssııasy aldynda úlken synaqtan ótti. Bizdiń talabymyz boıynsha ónerge degen beıimdiligi, qabileti bolýy kerek. Óner mektebinde oqyǵysy keletinderdiń sany óte kóp. Bir orynǵa bes baladan keldi. Biraq bizdiń múmkindigimiz az. Oǵan óner mektebiniń jeke ǵımaraty joq ekendigi de áser etip otyr»,- dedi Gúlmıra Jankeldiqyzy.
Aıta ketý kerek, atalǵan bilim ordasynyń shákirtteri birqatar shetelderge baryp, óner saıystaryna qatysyp, júldemen oralyp júr.
Óner mektebiniń ujymyna ata-analar rızashylyǵyn bildirdi.
Búgingi sharada óner ujymynyń shákirtteri ustazdary men ata-analarynyń aldynda shaǵyn kontsert qoıyp, yqylasqa bólendi.
