Astana qalasyndaǵy bombapanada bolǵan órtte qaza tapqandardyń otbastaryna 1 mıllıon teńgeden materıaldyq kómek kórsetiledi
ASTANA. Aqpannyń 20-sy. QazAqparat /Gúlmıra Álıakparova/ - Astana qalasyndaǵy bombapanada bolǵan órtte qaza tapqandardyń otbastaryna 1 mıllıon teńgeden materıaldyq kómek kórsetiletin boldy. Astana basshysy Imanǵalı Tasmaǵambetovtyń bul usynysyn búgin ótken qalalyq máslıhattyń kezekten tys otyrysynda depýtattar biraýyzdan qoldady,
dep habarlaıdy QazAqparat.
«Áriptesterimiz kenetten bolǵan oqıǵa kezinde ózderiniń kásibı mindetterin adal ári minsiz atqaryp, azamattyq boryshtaryn óteý ústinde ómirlerin sarp etti. Bul olardyń aǵaıyn-týystary men otbasy úshin ǵana emes, barlyǵymyz úshin de úlken qaıǵy. Aqpannyń 18-inde bombapanada shyqqan órttiń shyǵý sebebin anyqtaý boıynsha komıssııa quryldy. Qazir biz úshin azamattardy jerleýdi uıymdastyrý, olardyń otbastaryna moraldyq jáne materıaldyq kómek kórsetý mańyzdy. Osy rette jergilikti atqarýshy organnyń rezervinen kezek kúttirmeıtin shyǵystar úshin 2010 jylǵa qarastyrylǵan qarajattar esebinen, qurban bolǵandardyń januıalarynyń árqaısysyna 1 mıllıon teńgeden eseptegende barlyǵy 3 mıllıon teńge kóleminde qarjy bólýdi suraımyn», - dedi ol.
Qala ákiminiń bul usynysyn máslıhat depýtattary biraýyzdan qoldady. Qarjyny úlestirý Jumyspen qamtý jáne áleýmettik baǵdarlamalar basqarmasyna júkteldi.
Aıta keteıik, elordadaǵy bombapanada bolǵan órtte mert bolǵan azamattardyń otbastaryna materıaldyq kómek kórsetý týraly tapsyrmany keshe, aqpannyń 19-y kúni ótken Úkimet otyrysynda Premer-Mınıstr Kárim Másimov bergen bolatyn.
Esterińizge sala keteıik, Astanadaǵy Yqylas Dúkenuly atyndaǵy kóshedegi tehnoparktiń aýmaǵynda ornalasqan bombapanadaǵy órt aqpannyń 17-si kúni shyqty. Jalynnyń sharpyǵan aýmaǵy shamamen 500 metrdi qurady (bombapananyń jalpy aýmaǵy 1080 sharshy metr). Tilsiz jaýdy aýyzdyqtaý barysynda úsh adam qaza tapty. Olar Astana qalasynyń Tótenshe jaǵdaılar departamenti bastyǵynyń orynbasary, polkovnık Valerıı Zaıtsev, departamenttiń altynshy órt sóndirý bóliminiń bastyǵy, maıor Rýslan Kákishev, arnaıy órt sóndirý bólimi qyzmeti bastyǵynyń orynbasary Saıat Ábeev. Olardyń deneleri keshe, aqpannyń 19-y kúni, tańǵy saǵat 7-lerde tabyldy.
Keshe ótken Úkimet otyrysynda Tótenshe jaǵdaılar mınıstri Vladımır Bojko bombapana kúrdeli, ári onyń qabyrǵasy men shatyry aıtarlyqtaı qýatty bolǵandyqtan órtti sóndirý qıynǵa soqqanyn aıtqan bolatyn. Sondyqtan astanalyq qutqarýshylarǵa kómekke Qaraǵandydan jabyq jerlerdegi aýany soryp alatyn qurylǵy shaqyryldy. «Ol qurylǵy jabyq jerdegi kıslorodty soryp alyp, órt úderisin basý úshin qoldanylady. Qurylǵy keshe kúni boıy jumys istedi jáne óziniń rólin atqara aldy. Biz búgin tańerteń bombapananyń ishine kirýge múmkindik aldyq. Onda qaza tapqan adamdardy taýyp, olardyń denesin syrtqa shyǵardyq», degen bolatyn V.Bojko.
Bombapanadaǵy órtti tolyǵymen aýyzdyqtaý eki kúnnen keıin ǵana múmkin boldy. Al onyń shyǵý sebebin Astana qalasy ákiminiń orynbasary Vasılıı Krylov tóraǵalyq etken arnaıy komıssııa anyqtaıtyn bolady. Bombapana Astana qalasynyń múlki bolyp tabylady. Onda halyqty qorǵaýǵa arnalǵan múlikter aıtarlyqtaı kóp kólemde saqtalǵan.
S.Ábeevpen qoshtasý búgin, aqpannyń 20-sy kúni saǵat 10-da onyń qyzmet ornynda (AÓB-3) ótedi. Al V.Zaıtsev jáne R.Kákishevpen qoshtasý jeksenbi, aqpannyń 21-i kúni saǵat 9.00-de «Jastar» saraıynda ótedi.
