Astana qalasyndaǵy №24 orta mektep 40 jyldyq mereıtoıyn atap ótti
ASTANA. 26 qazan. QazAqparat - Keshe Astana qalasyndaǵy №24 orta mektep óziniń irgetasy qalanǵanyna 40 jyl tolýyn atap ótti. Bul mektep «Prıgorodnyı» kentinde ornalasqan.
Osy mereıtoıǵa arnalǵan saltanatty sharaǵa Astana qalalyq bilim basqarmasynyń bastyǵy Ásıma Bımendına qatysyp, mekteptiń sońǵy jyldardaǵy tabystaryn atap ótti. Aldaǵy ýaqytta bilim berý isinde jetistikteri mol bolýyna tilegin bildirdi. Shynymen de, bul mektep bilim jáne óner salasy boıynsha jaqsy nátıjelerge qol jetkizip keledi. Mekteptiń úzdik oqıtyn shákirtteri qalalyq, respýblıkalyq olımpıadalarda júldeli oryndardy ıelenip júr. Aıtalyq, bir oqýshy orys tili páni boıynsha ótken respýblıkalyq jarysta ekinshi oryn alsa, basqa da pánderden jaqsy nátıje kórsetip júrgen shákirtter bar.
Bilim uıasynyń osyndaı ıgi qadamdaryn eskere kele, Astana qalalyq bilim basqarmasynyń bastyǵy Ásıma Bımendına osy mekteptiń 9 muǵalimine Alǵys hat pen Qurmet gramotalaryn tabys etti.
Búgingi is-sharaǵa Esil aýdandyq ákimshiliginiń, Astana halyqaralyq áýejaı AQ-nyń jáne «Jasyl aımaq» memlekettik kásiporynyń ókilderi qatysty.
Mektep mereıtoıyna qurmetti qonaq retinde zeınet demalysyndaǵy ardager ustazdar shaqyryldy. Bilim uıasynyń 20-ǵa jýyq burynǵy muǵalimderi keldi. Aralarynda mektep ashylǵan kezden beri qyzmet jasaǵan ustazdar da bar. Sonyń biri Sara Qalıqyzy Jazına mekteptiń ustazdar ujymyna, shákirtterge izgi tilegin jetkizdi. Mekteptiń qazirgi zamanǵy tehnologııalarmen qamtamasyz etilgenin, bilim berý isi jańa deńgeıge kóterilgenin atap ótti. Ardagerler búgingi jaǵdaıǵa qarap, ózderi jumysqa qaıtadan kelgisi keletinin jasyrmady.
№24 orta mekteptiń dırektory Ǵabıt Súndetov: «Ustazdar qaýymy táýelsiz elimizdiń jas urpaǵyn tárbıelep, alǵa qoıǵan mindetterdi oryndaý jolynda eńbek etýde. Basty maqsatymyz - bilim berý sapasyn jetildirý, muǵalimderimiz de, shákirtterimiz de bilim nátıjesi arqyly aldyńǵy qatardan kóriný. Mektep ujymy osy baǵytta jumys istep jatyr»,- dedi.
