Astana qalasynda jaı túsýden zardap shekken 6 balanyń 5-eýi aýrýhanadan shyqty
ASTANA. Tamyzdyń 6-sy. QazAqparat /Gúlmıra Álıakparova/ - Astana qalasynda tamyzdyń 5-i kúni jaı túsip, aýrýhanaǵa jetkizilgen 6 balanyń 5-eýi tolyq saýyǵyp shyqty.
Bul týraly búgin QazAqparat tilshilerine suhbat bergen №2 qalalyq balalar aýrýhanasynyń bas dárigeri Qarshyǵa Qulmuhanov málim etti.
Eske sala keteıik, búgin tańerteń QR Tótenshe jaǵdaılar mınıstrligi keshe, tamyzdyń 5-i kúni 18 saǵat 17 mınýtta Esil aýdanynda ornalasqan elordalyq oıyn-saýyq saıabaǵyndaǵy jaǵajaıda demalyp júrgen 11 adamǵa jaı túskendigin, onyń ishinde 35 jastaǵy bir áıeldiń oqıǵa ornynda qaza tapqanyn habarlaǵan bolatyn.
Sońǵy anyqtalǵan málimetter boıynsha, naızaǵaı saldarynan barlyǵy 12 adam zardap shekti, onyń biri kóz jumsa, 11 adamnyń arasynda alty bala - №2 qalalyq balalar aýrýhanasyna, bes azamat - Respýblıkalyq jedel medıtsınalyq járdem ǵylymı ortalyǵyna jatqyzyldy.
Q.Qulmuhanovtyń aıtýynsha, qazirgi ýaqytta alty balanyń beseýi jaqsy densaýlyq jaǵdaıymen úılerine qaıtaryldy.
«Qaıta jasalǵan zerthanalyq taldaýlar olardyń densaýlyqtaryna qaýip joqtyǵyn kórsetti. Al bireýiniń jaǵdaıy sál aýyrlaý, oǵan tósek rejimi belgilendi. Balalar elektr qýatynyń aımaǵyna túsip qalǵan. Olardy perishteleri qaǵyp qaldy dep aıta alamyn», - deıdi bas dáriger.
Sondaı-aq Astana qalasynyń densaýlyq saqtaý basqarmasy bastyǵynyń orynbasary Lıazzat Ahmetnııazova, Respýblıkalyq jedel medıtsınalyq járdem ǵylymı ortalyǵyna jatqyzylǵan azamattardyń da jaǵdaıy qanaǵattanarlyq ekendigin málim etti.
