Astana qalasynda UBT boıynsha ortasha ball - 89,2
ASTANA. QazAqparat - 2016 jylǵy 2-6 maýsymda elordada Biryńǵaı ulttyq testileý ótti. Qala boıynsha ortasha ball 89,2 qurady, ótken jylmen salystyrǵanda bul kórsetkish 2,6 ballǵa ósken, dep habarlady qalalyq ákimdiktiń baspasóz qyzmetinen.
Ústimizdegi jyly 4 695 túlektiń 3 785-i testileýge qatysty, bul túlekterdiń jalpy sanynyń 80,6% quraıdy.
887 oqýshy (18,9%) dástúrli emtıhan tapsyrdy, onyń ishinde 262-si - halyqaralyq olımpıadalar men ǵylymı jobalar konkýrstarynyń (jarystardyń) jeńimpazy, 625 - taıaý jáne qıyr sheteldik JOO-larǵa oqýǵa túsetin túlekter. 23 oqýshy densaýlyǵyna baılanysty qorytyndy attestatsııadan bosatyldy.
Ulttyq emtıhannyń qorytyndysy boıynsha № 72 mektep-lıtseıiniń túlegi Nurasyl Erjanov 125 suraqtyń barlyǵyna durys jaýap bergen. 1460 (38,6%) túlek 100-125 ball jınady, 150 (5%) oqýshy shekti ball ala almaǵan.
«Altyn belgige» úmitker 187 túlektiń (Nazarbaev ýnıversıtetine túsetindikten bireýi emtıhan tapsyrýdan bas tartty) 127-si óz bilimin rastady, bul 67,9% quraıdy, 10 oqýshyǵa 1 balldan jetpeı qaldy, 3 oqýshy qaıta tapsyratyn boldy.
«Altyn belgi» ıegerlerine attestattar tabystaý rásimi 17 maýsymda elorda ákimdiginiń aldyndaǵy qalalyq alańda ótedi.
