Astana qalasynda Sırııa sııaqty «vınegretti» sheshý ońaıǵa soqpas - saıasattanýshy Kazantsev
Sebebi ol jerdegi áskerı qarym-qatynas "vınegret" ispetti. Osy oraıda reseılik saıasattanýshy Andreı Kazantsev kez kelgen nársege asa saq bolýǵa keńes berip otyr, dep xabarlaıdy QazAqparat tilshisi.
"Búginde Sırııadaǵy oppozıtsııanyń naqty bet-beınesi joq. Oǵan myńdaǵan dala jasaqtary kiredi. Olar únemi ıdeologııalyq ustanymdaryn ózgertip otyrady. Búgin ustamdy bolsa, erteń "ál-Nýsranyń" atynan sóıleýi múmkin. Kúrdtermen til tabysýǵa bolady. Budan bólek, DAISh bar. Ol da óz ishinde birneshe topqa bólinedi. Endi, osy "vınegretke" Taıaý Shyǵystaǵy súnneter men sheıitter arasyndaǵy aımaqtyq shıelenisti qosyńyz. Ol - Saýd Arabııasy men Iran arasyndaǵy teketires. Oǵan taǵy AQSh pen Reseı sııaqty derjavalardyń múddelerin qossańyz, úsh deńgeıli shıelenis bolyp shyǵa keledi. Mine, Sırııadaǵy qazirgi jaǵdaıdyń qarapaıym sıpattamasy osyndaı. Endi, ony belgili bir deńgeıde beıbit jolmen sheshý sharalary joǵary deńgeıde turǵandardyń múddesine saı kelmeýi de múmkin. Máselen, Sırııanyń ishki máselesin sheshemiz dep, aımaqtyq derjavalardyń teketiresin ýshyqtyryp alýǵa bolady. Sol sııaqty Reseı men Túrkııa arasyndaǵy qarym-qatynasty jaqsartýǵa degen qulshynys dala komandırleri úshin tıimsiz bolýy yqtımal", - dedi Kazantsev búgin Qazaqstannyń strategııalyq zertteýler ınstıtýtynda ótken jıyn barysynda. Saıasattanýshy óz pikirin beınebaılanys arqyly bildirdi.
Onyń aıtýynsha, búginde Sırııadaǵy shıelenistiń kúrdeli ekenin eskersek, ony naqty bireý basqaryp otyr dep aıtý qıyn. Degenmen, qazirgi kezde bılikke Tramptyń kelýimen AQSh pen Reseı sııaqty álemdik derjavalar deńgeıindegi qarym-qatynas jaqsaryp keledi. Túrkııa da Reseımen ymyraǵa keldi. "Alaıda, Saýd Arabııasyna Reseıdiń Túrkııamen, oǵan qosa, AQSh-pen jaqyndasýy unamaı otyr. Mine, aımaqtyq deńgeıde osy bir másele bar. Al, eń tómengi deńgeıde Sırııanyń óz ishindegi dala komandırlerin aýyzdyqtaý qajet", - dep atap kórsetti saıasattanýshy.
