Astana qalasynda Sátbaev kóshesindegi HQKO óz jumysyn bastady
ASTANA. 6 jeltoqsan. QazAqparat - Astana qalasynda Sátbaev kóshesindegi HQKO óz jumysyn bastady, dep habarlady QR Kólik jáne kommýnıkatsııa mınıstrliginiń baspasóz qyzmeti.
Jańǵyrtylǵan HQKO-da Connection Point ózine-ózi qyzmet etý sektory, memlekettik organdar tulǵalaryna júginetin oryndar, sonymen birge, zeınetkerlerge, júkti áıelderge jáne múmkindikteri shekteýli adamdarǵa qyzmet kórsetý oryndary bar.
Atap aıtqanda, Connection Point ózine-ózi qyzmet etý sektorynda azamattar ózdigimen kezeksiz memlekettik qyzmetti alady. Sol jerde olardyń memlekettik qyzmetterdi alýǵa qajet elektrondyq tsıfrlyq qoltańbalary (ETsQ) bolmasa, ony jasap beredi.
Sonymen qatar osy HQKO-nda endi múmkindikteri shekteýli adamdarǵa, júkti áıelderge jáne zeınetkerlerge kezeksiz qyzmet kórsetý úshin arnaıy qosymsha tereze jumys jasaıdy.
«HQKO jańǵyrtýyn ótkizý men bıznes-úderisterdi ózgertý arqasynda azamattardyń kezekte kútý ýaqyty qysqartyldy jáne de ortasha alǵanda 20 mınýttan aspaıdy. Belgili sebeptermen zeınetkerlerge, júkti áıelderge jáne múmkindikteri shekteýli adamdarǵa kezekte turý qıynǵa túsedi. Sondyqtan biz olarǵa qyzmet kórsetý úshin bólek terezeni uıymdastyrdyq», dep túsindirdi «HQKO» RMK dırektorynyń orynbasary Ásemgúl Baltasheva.
Sonymen birge ol HQKO densaýlyq jaǵdaıyna baılanysty qozǵalý qıyndyǵy bar múmkindikteri shekteýli azamattarǵa úı jaǵdaıynda qyzmet jasaıtynyn eske saldy.
HQKO birneshe kúndik jumysynda eki myńǵa jýyq adamǵa qyzmet kórsetkenin atap aıtqan jón.
Jańartylǵan HQKO Sátbaev (burynǵy Mırzoıan) kóshesi 25 meken-jaıy boıynsha ornalasqan jáne qaladaǵy eń tanymal bolyp keledi, kún saıyn onda myńǵa deıin kelýshi qyzmet alady.
