Astana qalasynda ótkiziletin saltanatty áskerı sherýge áskerlerdiń barlyq túri qatysady - QR Qorǵanys mınıstrligi

STANA. Tamyzdyń 18-i. QazAqparat - Eki aptadan keıin Qazaqstan Konstıtýtsııasyna 15 jyl tolady. Osy merekege oraı tamyzdyń 30-y - Qazaqstan Respýblıkasynyń Konstıtýtsııasy kúni «Qazaq eli» monýmentiniń janyndaǵy elimizdiń bas alańynda áskerı parady ótedi, dep habarlaıdy QR Qorǵanys mınıstrliginiń baspasóz qyzmeti.

Sherýge Qarýly Kúshterden Qurlyq áskerleriniń, Áýe qorǵanysy kúshteriniń jáne Áskerı-Teńiz kúshteriniń, sondaı-aq Іshki ister mınıstrliginiń, Ulttyq qaýipsizdik komıtetiniń, Tótenshe jaǵdaılar jónindegi mınıstrliktiń jáne Respýblıkalyq ulannyń bólimderi qatysady. Áskerı sherýge qatysýshylardyń jalpy sany 2200 adamdy quraıdy. Olardyń qatarynda ofıtserler, kelisimshart boıynsha áskerı qyzmetshiler, áskerı oqý oryndarynyń kýrsanttary men merzimdi qyzmettiń sarbazdary bar.

- Paradtyq toptardy jasaqtaý úshin Qarýly Kúshterdegi laıyqty degen áskerı qyzmetshiler iriktep alyndy, - dep atap ótti parad qolbasshysy QR QK Qurlyq áskerleriniń bas qolbasshysy general-maıor Murat Maıkeev. - Qazirgi ýaqytta olar kún saıyn daıyndalýda. Tamyzdyń 30-ynda respýblıka jurtshylyǵy olardyń nátıjesine kýá bolady.

Paradqa qatysýshylardy ornalastyrý úshin Qyrqynshy stansydaǵy 68665 áskerı bólim aýmaǵynda arnaıy dalalyq lager jasaqtaldy. Shatyrly qalashyqta qajetti ınfraqurylym jasalǵan. Áskerıler úshin dalalyq ashana, medıtsınalyq beketter, bir sózben aıtqanda, barlyq jaǵdaı bar. Bıylǵy paradqa Otan qorǵaý jolyndaǵy jaýyngerlik tapsyrmalardy erlermen birge oryndap júrgen áskerı áıelderden quralǵan top tuńǵysh ret qatysqaly otyr. Osy áskerı bólimniń bazasynda paradqa qatystyrylatyn áskerı tehnıkalardy quraıtyn jaýyngerlik mashınalar parki ornalasqan.

Sherýge barlyq ásker tekterinen jaýyngerlik toptar, 150-den astam qarý-jaraq pen áskerı tehnıka jáne 66 avıatsııalyq tehnıka qatysady dep josparlanýda.
Mehanıkalandyrylǵan lekte «Land Rover», Qarýly Kúshterdegi T-72B tankileri, BMP-2 jaıaý ásker jaýyngerlik mashınasy, zenıt-zymyran keshenderi, «Hammer» avtokólikteri, jetildirilgen bronetransporterler, D-30 122 mıllımetrlik gaýbıtsalar, «Msta-B» 152 mm gaýbıtsasy bar artıllerııalyq batareıa, «Grad», «Ýragan» syndy dúrkindep oq atý reaktıvti júıeleri, artıllerııalyq jáne raketalyq qarýlar sapyndaǵy «Smerch», «Tochka-Ý» syndy qýatty qarýlar bar.