Astana qalasynda ótken segiz aıda balalardyń qatysýymen 37 jol-kólik oqıǵasy oryn aldy, olarda 4 bala mert boldy
ASTANA. Qyrkúıektiń 9-y. QazAqparat /Gúlmıra Álıakparova/ - Ústimizdegi jyldyń ótken segiz aıynda Astana qalasynda balalardyń qatysýymen 37 jol-kólik oqıǵasy oryn aldy, olarda 4 bala mert bolyp, 30 -y túrli dárejedegi jaraqattar aldy. Bul týraly búgin №2-shi qalalyq aýrýhanada ótken baspasóz máslıhatynda qalalyq ІІD Jol polıtsııasy basqarmasynyń uıymdastyrý-taldaý jáne aldyn alý jumystary bóliminiń bastyǵy Marat Tuıaqov málim etti.
M.Tuıaqov atap kórsetkendeı, 2009 jyldyń sáıkes kezeńinde balalardyń qatysýymen 60 jol-kólik oqıǵasy tirkeldi.
№2-shi qalalyq emhananyń jaraqat bólimshesiniń meńgerýshisi Bektasov Jarylǵasynnyń aıtýynsha, ótken jyldyń segiz aıynda aýrýhanaǵa jol-kólik oqıǵalarynan keıingi túrli jaraqattarmen 119 bala jetkizilse, 2010 jyldyń segiz aıynda bul kórsetkish 142-ni qurady.
«Ókinishke qaraı, balalardyń joldarda jaraqat alý kórsetkishteri jyldan jylǵa kóbeıip keledi. Bul bir jaǵynan qalada balalar sanynyń jáne avtokólik quraldarynyń kóbeıýimen baılanysty. Bizge kóp jaǵdaıda balalar aýyr jaraqattarmen túsedi», - deıdi ol.
Eske salaıyq, qyrkúıek aıynyń 1-inen bastap Astana qalasyndaǵy árbir mekteptiń aldyna jol polıtsııasy qyzemtkerleri qoıyldy.
Jalpy, ishki ister organdarynyń málimetterine sáıkes, bıylǵy jyldyń bes aıynda respýblıka joldarynda 3742 jol apaty tirkeldi, olarda 785 adam qaza tapty, 4371 adam jaraqat aldy.
