Astana qalasynda «Chekti talap et - syılyqty utyp al» aktsııasy bastaldy
ASTANA. QazAqparat - Astana qalasynyń Memlekettik kirister departamenti tutynýshylardyń quqyǵyn qorǵaý jáne saýda men satyp alýshylarǵa qyzmet kórsetý salasynda zań mádenıetin qalyptastyrý úshin naýryz aıynan bastap 5 shildege deıin «Chekti talap et - syılyqty utyp al!» aktsııasyn ótkizetini týraly habarlaıdy. Astananyń ár turǵyny aktsııaǵa qatysa alady, dep habarlady qala ákiminiń baspasóz qyzmeti.
Aktsııanyń basty maqsaty - tutynýshylardyń quqyǵyn qorǵaý, kásipkerlerdi adal básekelestikke yntalandyrý, qyzmet kórsetý sapasyn arttyrý, kóleńkeli ekonomıka kólemin azaıtý arqyly respýblıkalyq jáne jergilikti bıýdjetke salyq túsimin ulǵaıtý bolmaq.
Aktsııaǵa qatysý úshin chekti sýretke túsirip, sol sýretti WhatsApp arqyly +7 701 500 17 17 nomerine joldaý kerek. Ár chek úshin qatysýshyǵa biregeı nomer berilip, ol baǵaly syılyqtar utysyna qatysa alady. Qatysýshylar uıaly telefondar, smartfondar men gadjetterdi utyp alý múmkindigine ıe bolady. Habarlama neǵurlym kóp bolsa, syılyq utý múmkindigi de soǵurlym joǵary.
Aktsııa talaptary:
- Bir sýrette bir chek kórsetilýi tıis;
- Chek fıskaldy bolý kerek; (chekte FP, F, F jazbalary bolý qajet)
- Chek sýretinde mindetti túrde kúni, JSN (nemese BIN), qorytyndy soma kórsetilýi shart.
Tómendegi chekter eseptelmeıdi:
- Bir chektiń eki márte qaıtalanýy;
- Aktsııa talaptaryna saı emes chekter.
Kásipkerler chek bermese nemese kassalyq apparattar saýda oryndarynda bolmaǵan jaǵdaıda qatysýshylar Memlekettik kiris departamentine habarlasa alady. Ol úshin joǵarydaǵy nómirge aqparattyq habarlama jiberý kerek. Habarlamada mindetti túrde nysannyń ataýy, meken-jaıyn (múmkin bolǵan jaǵdaıda JSN, BIN, salyq tóleýshiniń ataýyn) jazý qajet.
Syılyqtar utysy 2015 jylǵy 05 shildede ótkiziledi.
