Astana qalasynda barlyq mansardtyq qabattar buzylady ma?
ASTANA. 15 qarasha. QazAqparat - Astana ákimdigi 2013 jyly mansardtyq qabattarǵa aspaptyq tekserýler júrgizetin bolada.
Bul týraly óziniń jeke blogynda turǵyndardyń suraǵyna jaýap bergen qala ákimi Imanǵalı Tasmaǵambetov aıtty.
Qala turǵyny Aıazbı Tólentaev: «Astana qalasynda salynǵan mansard etajdardy shetinen buzyp jatyr. Buzylmaı qalǵandary da bar. Álde barlyq mansardty buzý josparda bar ma? Eger buzylmasa, sol mansard qabattardyń qujaty qashan daıyn bolady?», - dep elorda basshysyna saýal joldady.
Óz kezeginde I.Tasmaǵambetov «Tehnogendik jáne tabıǵı sıpattaǵy jaǵdaılar týraly» QR Zańynyń 13-babyna sáıkes, jergilikti atqarýshy organdar tehnogendik jáne tabıǵı sıpattaǵy tótenshe jaǵdaılar aýmaǵynda jergilikti aýqymdaǵy tótenshe jaǵdaılardyń aldyn alý jáne joıý jóninde is-sharalar uıymdastyratyndyǵyn aıtty.
«Solardyń qorytyndysy boıynsha, Astana qalasynda 12 apattyq jaǵdaıdaǵy turǵyn úı anyqtaldy. Osyǵan oraı mansardtardy bólshektep, úılerdiń shatyrlaryn qalpyna keltirý jumystary qabattardy turǵyzý kezinde qurylys normalary men erejeleriniń buzylýy saldarynan týyndaǵan jergilikti aýqymdaǵy tótenshe jaǵdaılardy joıý jáne oqshaýlaý aıasynda júrgizilýde. Qurylystardyń tehnıkalyq jaǵdaıyn baǵalaý jáne yqtımal aqaýlardy anyqtaý maqsatynda basqarma 2013 jyly (turǵyn úılerdi) mansardtyq qabattarǵa aspaptyq tekserýdi josparlap otyr», - dedi ol.
Jáne barlyq týyndaǵan suraqtar boıynsha Astana qalasy Jumyldyrý daıyndyǵy, azamattyq qorǵanys, apattardyń jáne dúleı apattardyń aldyn alý men joıýdy uıymdastyrý basqarmasyna habarlasýǵa bolatyndyǵyn atap ótti.
