Astana qalasynda aqyl-esi kenje damyǵan balalar teń dárejede bilim alýda
ASTANA. 12 aqpan. QazAqparat - Aqyl-esi kenje damyǵan balalar qatarlastarymen qarym-qatynasta da, bilim alýda da keıin qalyp jatady.
Qazir elordada balalardyń qoǵamdaǵy áleýmettik múmkindikterin jaqsartý úshin ınklıýzıvtik bilim berý tájirıbesi pármendi júrgizilip keledi. Onyń kómegimen mundaı balalardyń teń dárejede bilim alý quqyqtary júzege asyrylýda. Bul týraly elordanyń astana.kz resmı saıtynan habarlandy.
Qalalyq Bilim basqarmasynan habarlaǵanyndaı, aqyl-esi kenje damyǵan balalar psıho-medıtsınalyq-pedagogıkalyq komıssııanyń qorytyndysy negizinde ata-analarynyń ótinishi boıynsha toptastyrylady. Osyǵan oraı, 2013 jyldyń qańtarynda Astana qalasynda 33 bilim berý mekemesinde 123 synypta qalypty balalarmen teń dárejede aqyl-esi kenje damyǵan 151 bala bilim alýda.
«Balalardy oqytý úshin arnaıy jaǵdaı jasalǵan orta qalyptastyrylady. Oqý bólmeleri materıaldyq-tehnıkalyq jaǵynan jabdyqtalyp, túzetý jáne beıimdeý is-sharalary júrgiziledi. Eń bastysy, bilim alýǵa esh kedirgi keltirmeıtin jáne qatarlastarymen erkin aralasýǵa múmkindik týǵyzylatyn jaǵdaı uıymdastyrylady. Sonymen qatar, elordada 19 túzetý synyby bar. Onda aqyl-esi kenje damyǵan 726, qulaǵy estimeıtin 79, kózi nashar kóretin 161, tili kemis 49 bala bilim alýda. Saryarqa aýdanynda 13 mektepte 728 oqýshy, Almaty aýdanynda 5 mektepte 273 oqýshy jáne Astana qalasynyń balalar úıinde 9 oqýshy oqıdy», delingen baspasóz habarlamasynda.
