Astana qalasynda «Aq taıaq» festıvaliniń jeńimpazdary marapattaldy
ASTANA. QazAqparat - Búgin Astanada «Qazaq soqyrlar qoǵamynyń» qalalyq bólimshesiniń jyldyq qorytyndysyna oraı kontsert ótti, dep habarlady astana.kz.
Halyqaralyq zaǵıptar kúnine oraı ótken «Aq taıaq» saıysynyń jeńimpazdaryn marapattaý rásimi de osy kontserttiń aıasynda júrildi. Elimiz kóleminde 20 myńnan astam janarynan aırylǵandar bar. Solardyń 450-i elorda turǵyndary. Búgingi merekege solardyń barlyǵy shaqyrylǵan. Bul taǵdyr taýqymetin kótergen jandardyń kóńiline demeý. «Soqyrlar qoǵamyna 75 jyldan astam ýaqyt boldy. Al múgedek jandardy ońaltý jumystaryn jyl boıy júrgizip otyramyz. Sonyń qorytyndysy 13 qazan álemdik soqyrlar kúni qarsańynda «Aq taıaq» festıvaliniń aıasynda shyǵady. Búginde sol sharaǵa jınaldyq. Birinshi orynǵa on adam, ekinshi, úshinshi oryndarǵa 17 adamnan on túrli saıysta barlyǵy 44 adamdy marapattaýdamyz. Ótken jyly bir adam konkýrstyń barlyq túrine qatysqan. Bıyl bir adam bir ǵana saıys túrinen baq synady. Barlyǵy úıde otyrǵan adamdar bolǵan soń, solardyń kóńilin kóterý úshin, solarǵa syı-sııapat berý úshin ótkizilip otyrǵan shara», - dedi Astana qalalyq soqyrlar qoǵamynyń tóraǵasy Qýanyshbek Tátenov. Prezıdent jyl saıynǵy halyqqa Joldaýynda múmkindigi shekteýli jandar jaıly «Biz olardy belsendi ómirge tartamyz, olar tek járdemaqy alyp qana qoımaıdy, sonymen birge, ózderin qoǵamnyń múshesi, paıdaly eńbekker retinde sezinetin bolady.» - degen bolatyn. Bul múgedek jandarǵa elimizdiń jasap otyrǵan erekshe qamqorlyǵy. Kongress Holl saraıynda ótken marapattaý saltanatyna depýtattar, qoǵam músheleri jáne jarym kóńil jandarǵa qol ushyn sozyp, demeýshilik jasap júrgen azamattar keldi.
