Astana qalasynda 83 myńnan asa bala balabaqsha kezeginde tur (FOTO)
ASTANA.QazAqparat - Qazirgi málimetke súıensek, Astana qalasynda 83 552 bala mektepke deıingi bilim berý uıymdarynan oryn alý úshin kezekte tur. Bul týraly búgin elordanyń bilim qyzmetkerleri jınalǵan tamyz konferentsııasy barysynda Astana qalalyq bilim basqarmasynyń jetekshisi Elmıra Sýhanberdıeva málim etti.
«Sózsiz, ustazdyń tilegi - aldymyzǵa kelgen ár balaǵa tereń bilim berý, ony úlken ómirge bilimmen qarýlandyryp jiberý. Biraq, bul tilek oryndalý úshin maqsattyń irgetasy myqty bolý kerek. Bul irgetasty mektepke deıingi bilim qalaıdy. Qazirgi sátte, mektepke deıingi bilim - orta bilimniń alǵashqy satysy bolyp qalyptasty,-degen qalalyq bilim basqarmasynyń basshysy Astana qalasyndaǵy mektepaldy bilim berý máselesiniń jaı-kúıine toqtaldy. «Bizdiń qalamyzdaǵy mektepaldy bilim oryndaryna baratyn balalardyń sany jyl saıyn artyp otyrady. Sebebi, qalaǵa qonys aýdaratyn azamattardyń sany kóp jáne elordadaǵy bala týý kórsetkishi jaqsarǵan. Astana qalasynyń bilim basqarmasy mektepke deıingi bilim berýdiń áleýmettik qajettiligine monıtorıng júrgizip otyrady. Búgingi tańda qalamyz boıynsha mektepaldy bilim berý uıymdaryna barý úshin 83 552 bala kezekte tur. Bizdiń qalamyzdyń bilim berýdegi saıasaty - balalardyń barlyǵyn balabaqshamen qamtý. Alaıda, jasyratyny joq, bul másele áli de ózekti kúıinde qalyp otyr»,-dedi ol.
