Astana qalasynda 2009 jyly 644 órt shyǵý oqıǵasy tirkelse, 2010 jyly onyń sany 688-ge jetken
ASTANA. 28 qańtar. QazAqparat. /Aınur Kenebaeva/ - Elordamyzdaǵy órt qaýipsizdigi máselesiniń búgingi kúngi ózektiligine oraı, Astana qalasy ákimdiginde «Tunshyqtyrǵysh gazben ýlanýdyń aldyn alý» taqyrybynda dóńgelek ústel ótti.
Dóńgelek ústelge Astana qalasy densaýlyq saqtaý basqarmasy bastyǵynyń orynbasary Laýra Ahmetnııazova, Astana qalalyq órt sóndirý jáne baqylaý basqarmasynyń bastyǵy Barat Duzaqbaev, Astana qalasy bilim basqarmasynyń bólim bastyǵy Mádına Súleımenova qatysty.
«2009 jyly turǵyn úı keshenderinde 370 órt tirkelse, bul san 2010 jyly 407 bolǵan jáne 2009 jyly órt saldarynan qaıtys bolǵan bala sany 4-eý bolsa, 2010 jyly qaıǵyly oqıǵa nátıjesinde 12 balanyń ólimi tirkelgen», - dep málimdedi L.Ahmetnııazova óz sózinde.
Astana qalasynda 2009 jyly 644 órt shyǵý oqıǵasy tirkelse, 2010 jyly órt sany 688-ge jetken. Órt shyǵý oqıǵalary negizinen jylytý merzimi bastalǵan ýaqytta órship, tehnıka-qaýipsizdik erejeleriniń durys saqtalmaýy saldarynan týyndaıdy.
«2010 jyly 688 órt oqıǵasy oryn alyp, jalpy alǵanda 41 mln. 650 myń teńge kólemindegi materıaldyq shyǵyn keltirilgen. Sondyqtan qazirgi tańda tótenshe jaǵdaılar departamenti órt shyǵý oqıǵalarynyń aldyn alý maqsatymen óndiristegi jáne turǵyn úı keshenderindegi órt qaýipsizdigi jaǵdaıyn qamtamasyz etý sharalaryn qatań baqylaýǵa alyp otyr», - dedi B.Duzaqbaev.
«2006 jyly qalalyq bilim berý mekemeleriniń órtke qarsy avtomattandyrylǵan júıelermen qatmamasyz etilýi 60%-dy qurasa, bul kórsetkish búgingi kúni 100 paıyz bolyp otyr. 2010 jyly órt qaýipsizdigin qamtamasyz etý sharalaryna 29 mln. 116 myń teńge bólingen», - dep málimdedi M. Súleımenova qalalyq bilim berý mekemelerindegi órt qaýipsizdigin saqtaý jaǵdaılaryna qatysty baıandamacynda.
