Astana qalasynan 30-35 shaqyrym jerde jańa áýejaı salynady
ASTANA. 31 qańtar. QazAqparat /Arman Asqarov/ - 2030 jylǵa deıin Astana qalasyn damytýdyń aımaqtyq josparyna sáıkes jańa áýejaı qaladan 30-35 shaqyrym qashyqtyqta salynady.
Bul týraly búgin jýrnalısterge suhbat bergen «Astana qalasynyń Bas jospary ǵylymı-zertteý jobalaý ınstıtýty» MKK-nyń qalalyq kólik bóliminiń bastyǵy Aıdar Rahym málim etti.
Onyń habarlaýynsha, jańa áýejaı halyqaralyq talaptarǵa saı bolmaq. «Osy talaptardyń biri - áýejaıdyń qaladan 30-35 shaqyrym shalǵaı jerde ornalasýy. Ol Kókshetaý tas joly boıyndaǵy Shortandy mekeninde nemese Qaraǵandy tas jolynda ornalasqan Osakarovka eldi mekeninde salynýy múmkin. Qazirgi áýejaı ishki baǵyttarmen jumys isteıtin bolsa, jańa áýejaı halyqaralyq baǵyttarǵa qyzmet kórsetetin bolady», - deıdi A.Rahym.
Sondaı-aq jańa temirjol vokzaldarynyń qurylysyna toqtalǵan ol: «Jańa jolaýshylar vokzaly Aqjol jáne Músirepov kósheleri mańaıynda salynsa, odan bólek júk vokzaly óndiristik aımaqta, jylý elektr stansasynyń arǵy jaǵynda boı kóteretin bolady», - dedi.
