Astana qalasy Tótenshe jaǵdaılar departamenti gaz-tehnıkalyq qadaǵalaý ınspektsııasyn engizý qajettigin aıtady
ASTANA. Qańtardyń 14-i. QazAqparat /Gúlmıra Álıakparova/ - Turǵyn úılerdegi gazdyń jarylýyn gaz-tehnıkalyq qadaǵalaý ınspektsııasyn engizý arqyly aldyn alýǵa bolady. Bul pikirin búgin ótken baspasóz máslıhatynda Astana qalasy Tótenshe jaǵdaılar departamentiniń bastyǵy Jumabaı Eskendirov bildirdi,
dep habarlaıdy QazAqparat.
«Biz órtterdiń aldyn alý máselesimen órtke qarsy qyzmet qana emes, gaz-tehnıkalyq ınspektsııasy da aınalysý tıistigin burynnan kóterip kelemiz. Mundaı qyzmet qalada, jalpy el boıynsha qurylýy tıis. Sebebi turmysta gazdyń qoldanylýyn eshkim baqylamaıdy», - dep atap ótti departament bastyǵy.
Onyń aıtýynsha, belgili sebeptermen atalmysh qyzmet túri qysqartylyp, búgingi kúni olar qadaǵalaý qyzmetterin atqaryp otyrǵan joq.
Buǵan deıin habarlanǵanyndaı, qańtardyń 13-i kúni Saryarqa aýdany Á.Moldaǵulova kóshesindegi 24-shi úıde ornalasqan kópqabatty turǵyn úıde gaz ballonynyń jarylýy boldy. Onyń saldarynan úsh páter zaqymdanyp, tórt adam túrli dárejedegi kúıik jaraqattaryn aldy. 15 adam qaýipsiz jerge kóshirildi. Dárigerlerdiń sózine qaraǵanda, kúıik shalǵan eki áıeldiń jaǵdaıy óte aýyr.
J.Eskendirov, Astana qalasynda jańadan turǵyzylǵan záýlim úılerde órt kezinde avtomatty túrde qosylýy tıis qurylǵylardyń kóp jaǵdaıda jumys istemeıtindigin de tilge tıek etti. «Adamdar záýlim ǵımarattarda tútinniń taralyp ketýinen qaza bolady. Sebebi, avtomattardyń aqaýynan tútin syrtqa shyqpaı qalady», - deıdi ol.
Taǵy bir problema - atalmysh qurylǵylardyń jóndeý jumysymen eshkim aınalyspaıtyndyǵynda. Onyń paıymdaýynsha, bul máselemen mamandandyrylǵan kompanııalarmen kelisim-shartqa otyrý arqyly Páter ıeleri kooperatıvteri aınalysýy tıis.
