Astana qalasy prokýratýrasynyń narazylyǵymen ákimshilik jaýapkershilikke tartý týraly qaýlynyń kúshi joıyldy
ASTANA. 5 qyrkúıek. QazAqparat - Astana qalasynyń prokýratýra organdaryna S.B. Turǵanbekov degen azamattan onyń zańsyz ákimshilik jaýapkershilikke tartylǵany týraly shaǵym túsken.
Shaǵymnyń mazmunyna sáıkes ótinish berýshiniń ákimshilik jaýapkershilikke tartylýyna baılanysty ony memlekettik qyzmetke qabyldaýdan bas tartylǵan. Bul týraly Astana qalasy prokýratýrasynyń baspasóz qyzmeti habarlady.
Qala prokýratýrasy ótinishte kórsetilgen ýájder boıynsha tekserý júrgizip, nátıjesinde 2011 jyldyń 14 aqpany kúni Astana q. «Almaty» aýdandyq ІІB ýchaskelik ınspektory turǵylyqty jerinde tirkelmegeni úshin S.B. Turǵanbekovke qatysty QR ÁQtK 377-baby 1-bóligi boıynsha ákimshilik quqyq buzýshylyq týraly hattama toltyryp, «eskertý» túrindegi ákimshilik jaza qoldanǵany anyqtaldy.
Al S.B. Turǵanbekov hattama toltyrylǵan kezeńde Ońtústik Qazaqstan oblysynda bolǵanyn jáne eshqandaı ákimshilik quqyq buzýshylyq jasamaǵanyn aıtady.
Sot-jazýtaný saraptamasy ákimshilik quqyq buzýshylyq týraly hattama men qaýlydaǵy S.B. Turǵanbekovtiń qolyn basqa adamnyń qoıǵanyn kórsetti.
S.B. Turǵanbekovtiń is-áreketinde ákimshilik quqyq buzýshylyq quramy bolmaǵandyqtan, qala prokýratýrasy zańsyz aktiniń kúshin joıý týraly narazylyq engizdi jáne ol tolyǵymen qanaǵattandyryldy.
Sonymen qatar tekserý materıaldary polıtsııa ınspektoryna qatysty is júrgizý sheshimin qabyldaý úshin Astana qalasy ІІD ÓQB-ge joldandy.
Osylaısha, pármendi prokýrorlyq mán berý sharalary azamattyń konstıtýtsııalyq quqyǵyn qalpyna keltirýge yqpal etti.
