Astana qalasy men ShQO ákimdikteri arasynda 6 memorandýmǵa qol qoıyldy
ASTANA. QazAqparat - Óskemende Astana qalasynyń delegatsııasy men Shyǵys Qazaqstan oblysy memlekettik organdary ókilderiniń kezdesýi ótti, dep habarlaıdy QazAqparat Astana ákimdiginiń resmı saıtyna silteme jasap.
Ákimdik taratqan málimetterge qaraǵanda, «Óńirler arasyndaǵy aımaqaralyq yntymaqtastyqty damytý» resmı sharanyń negizgi taqyryby boldy.
Elordanyń 20 jyldyǵyna oraılastyrylǵan Shyǵys Qazaqstan oblysyndaǵy Astana kúnderi aıasynda Astana qalasy ákiminiń orynbasary Ermek Amanshaev basqarǵan astanalyq delegatsııa Óskemen qalasyna at basyn tirep, «Aımaqaralyq yntymaqtastyq - Astana - Shyǵys Qazaqstan oblysy» atty bıznes kezdesýge qatysty.
Kelissózder aıasynda eki jaqtyń isker toby men memlekettik organdardyń ókilderi kásipkerlikti qoldaý boıynsha óńirlik baǵdarlamalardy, MJÁ jobalaryn, ekonomıkany tsıfrlandyrý boıynsha ınnovatsııalyq sheshimderdi, qyzmet kórsetý salasyn damytý jáne basqa da baǵyttaǵy máselelerdi talqylady.
Shara sońynda Astana men Shyǵys Qazaqstan oblysy memlekettik organdarynyń arasynda aımaqaralyq yntymaqtastyqty damytý, óńirlerdiń básekege qabilettiligin arttyrý jónindegi kelisimder jasaldy. Taraptar 6 memorandýmǵa qol qoıdy. Dálirek aıtqanda, Astana men Shyǵys Qazaqstan oblysy ákimdikteri arasynda óńiraralyq kooperatsııany damytý, óńirlerdiń básekege qabilettiligin arttyrý boıynsha yntymaqtastyq jónindegi memorandým bekitildi.
Bekitilgen memorandýmdardyń qatarynda Astana qalasynyń ınvestıtsııalar jáne kásipkerlikti damytý basqarmasy men Shyǵys Qazaqstan oblysy ındýstrıaldy-ınnovatsııalyq damý basqarmasy arasyndaǵy ózara túsinistik pen yntymaqtastyq týraly, «Astana Innovations» AQ jáne Shyǵys Qazaqstan oblysynyń ındýstrııalyq-ınnovatsııalyq damý basqarmasy arasyndaǵy ózara túsinistik pen yntymaqtastyq týraly, «Astana» ÁKK» UK» AQ men SPK «Ertis» ÁKK UK» arasyndaǵy ózara túsinistik pen yntymaqtastyq týraly, sondaı-aq, «Astana Innovations» AQ men «Aqparattyq tehnologııalar ortalyǵy» KMM arasyndaǵy ózara túsinistik pen yntymaqtastyq týraly memorandýmdar bar.
Esterińizge sala keteıik, 18-20 shilde aralyǵynda Shyǵys Qazaqstan oblysynda Astana kúnderi ótken bolatyn. Úsh kún ishinde Semeı men Óskemen qalalary turǵyndarynyń nazaryna kontserttik baǵdarlamalar men elorda teatrlarynyń úzdik qoıylymdary usynyldy.
