Astana qalasy medıtsınalyq saqtandyrý tólemderi boıynsha kósh bastap tur

Qyrkúıek aıynda Astana qalasynyń jumys berýshileri men kásipkerleri 1 mlrd teńgeden astam jarna aýdarǵan. Al 2017 jyldyń shilde aıynan beri aýdarylǵan jarnanyń jalpy somasy 13 mlrd teńgeden asty. Bul týraly QazAqparat Qordyń baspasóz qyzmetine silteme jasap habarlaıdy.

Keltirilgen málimet boıynsha, jalpy respýblıka boıynsha Áleýmettik medıtsınalyq saqtandyrý qoryna 105 mlrd teńge túsken, bul somanyń 92%-i jumys berýshilerge tıesili. Jeke kásipkerler men azamattyq-quqyqtyq kelisimshart boıynsha jumys isteıtinder Qorǵa 8,6 mlrd teńge aýdardy.

Mindetti medıtsınalyq saqtandyrýdyń jınaqtalǵan qarjysy Ulttyq bankte saqtalady. Ulttyq bankpen Qor senimgerlik basqarý týraly kelisim bekitken. 2020 jyldan bastap bul qarajat Mindetti áleýmettik medıtsınalyq saqtandyrý paketi sheńberindegi qyzmetter aqysyn tóleýge jumsalady.

Bul ýaqytqa deıin «ÁMSQ» KEAQ tegin medıtsınalyq kómektiń kepildik berilgen kólemi sheńberinde medıtsınalyq qyzmetterdiń aqysyn tóleıtin qarjy operatory mindetin atqarady.

«Jyl basynan beri Qordyń Astana qalasy boıynsha fılıaly medıtsınalyq mekemelerge turǵyndarǵa kórsetken qyzmetteri úshin 60,8 mlrd teńge tóledi. Astana qalasynda biz 115 medıtsınalyq mekemelermen jalpy quny 84,6 mlrd teńgeni quraıtyn kelisimsharttar bekittik», - deıdi «ÁMSQ» KEAQ Astana qalasy boıynsha fılıalynyń dırektory N.Qabdyqaparov.

Esterińizge sala ketsek, árbir azamat óziniń Áleýmettik medıtsınalyq saqtandyrý júıesiniń medıtsınalyq qyzmetterdi tutynýshy retinde qatysýshysy bolatyndyǵy týraly aqparatty Halyqqa qyzmet kórsetý ortalyǵynyń bólimi arqyly anyqtamaǵa tapsyrys bere alady.