Astana qalasy mańyndaǵy eldi mekenderde alaıaqtyq qylmys órship tur
KÓKShETAÝ. QazAqparat - Astana qalasy mańyndaǵy eldi mekenderde alaıaqtyq qylmys órship tur, dep habarlaıdy oblystyq prokýratýranyń baspasóz qyzmetinen.
Vedomstvonyń málimetine qaraǵanda, sońǵy kezderi Tselınograd aýdanynda alaıaqtyq qylmystar beleń ala bastaǵan kórinedi. Ásirese, Qoıandy, Talapker, Qosshy jáne Qaraótkel eldi mekenderinde jer telimin satamyn dep aqshasyn alyp, artynan izim-ǵaıyp bolyp ketetinder sany kóbeıgen.
"2012 jyly Qosshy selosynda Taıpaqov esimdi azamat jer máselesin sheship beremin dep jeti adamnyń árbireýinen 900 myń teńgeden aqsha alyp, izin sýytty. Alaıda ańkaýlardy sendirip, alaıaqtyqpen baıymaq bolǵan azamattyń áreketinen túk shyqpady. Quqyq qorǵaý organdarynyń quryǵyna túsken ol 3 jylǵa bas bostandyǵynan aıyryldy", - deıdi prokýratýra qyzmetkerleri.
Sonymen qatar prokýratýra qyzmetkerleri óńirde telefon alaıaqtyǵynyń da órship turǵanyn aıtýda. Olar kóbine ańqaý turǵyndarǵa qońyraý shalyp, týysy ne balasynyń polıtsııaǵa nemese jol apatyna túsip qalǵanyn aıtyp sendiredi. Sóıtip, olardan aqshany bireý arqyly alyp nemese uıaly telefon nómirine birlik salǵyzý arqyly jymqyryp ketetin kórinedi.
