Astana qalasy qalyptasyp, damyǵan jyldar ishinde 32 mektep, 8 densaýlyq saqtaý nysany paıdalanýǵa berildi

Taǵy 25 shaǵyn balabaqsha ortalyǵy ashyldy.

Bul týraly Premer-Mınıstrdińfacebook paraqshasy men pm.kz. saıtynda jarııalanǵan aqparattan málim boldy. Buǵan deıin habarlanǵandaı, QR Týelsizdiginiń 20 jyldyǵy aıasynda atalmysh veb-resýrstarda óńirlerdiń jetistikterine arnalǵan maqalalar men jańalyqtar jarııalanyp turady.

«Balapan» baǵdarlamasyn júzege asyrý aıasynda sońǵy eki jyldyń ózinde-aq 5360 búldirshinge arnalǵan 24 balabaqsha men 28 jekemenshik balabaqsha ashyldy. Búgingi tańda barlyq mektepter men bilim berý oshaqtary ǵalamtorǵa qosylǵan. Osy jyldar ishinde kásiptik-tehnıkalyq bilim berý júıesinde 12 mekeme salyndy.

2005 jyldan beri 8 densaýlyq saqtaý nysany, sonyń ishinde kópbeıindi statsıonar, perınataldy ortalyq, bir aýysymda 500 adam qabyldaı alatyn 4 iri ambýlatorııalyq-emhanalyq keshen, № 3 qalalyq perzenthana, № 2 qalalyq aýrýhana, qan ortalyǵy jáne onkologııalyq dıspanser
paıdalanýǵa berildi.

Astanada 2007 jyldan beri Memlekettik tapsyrys aıasynda tegin qyzmetter men jeńildetilgen dári-dármekpen qamtamasyz etýge arnalǵan qarjylandyrý 2,5 esege kóbeıdi, bul maqsattarǵa 2011 jyly 2,2 mlrd. teńge bólindi. 

1997 jylmen salystyrǵanda jumyssyzdar sany 2 eseden astam kórsetkishke qysqaryp, ekonomıkalyq belsendi halyqtyń 6,3 paıyzyn qurady, resmı tirkelgen jumyssyzdar deńgeıi 8 paıyzdan 2 paıyzǵa deıin tómendedi.

Astanada ortasha aılyq nomınaldy jalaqy 1997 jyldan beri 10 eseden astam kórsetkishke kóbeıip, 9,8 myń teńgeden 110,8 myń teńgege jetti. Jan basyna shaqqandaǵy ortasha tabys 2001 jylǵy 14,3 myń teńge kórsetkishinen  73,8 myń teńgege deıin nemese 5 eseden artyqqa ósti, bul rette eń tómengi kúnkóris deńgeıi 2010 jyly 16,3 myń teńgeni qurady. Eń tómengi kúnkóris deńgeıinen tómen tabysy bar turǵyndar úlesi 2000 jylǵy 11,6 paıyzdan 2010 jyly 3,4 paıyzǵa deıin qysqardy.