Astana qalasy ákiminiń orynbasary Aıda Balaeva elordalyq kásipodaqtar aktıvimen kezdesti
ASTANA. 6 qyrkúıek. QazAqparat - Búgin QR Kásipodaqtar federatsııasynyń ǵımaratynda Astana qalasy ákiminiń orynbasary Aıda Balaeva kásipodaqtar aktıvimen kezdesti. Konstrýktıvti áńgime túrinde ótken otyrysta qala ákiminiń orynbasary Astana qalasynyń áleýmettik-ekonomıkalyq jáne bolashaqtaǵy damýy týraly tolyq aqparat usynyp, qalanyń ótkeni men bolashaǵynan kórneki faktorlar keltirip ótti, dep habarlady qalanyń resmı saıty.
«2013 jyldyń qańtar-shilde aılarynda aımaqtyq ındýstrıalandyrý kartasy aıasynda Astanada 10 joba iske qosylyp, 3 myńǵa jýyq jańa jumys orny ashyldy. Áleýmettik jaǵynan, qazirgi ýaqytta Astana ózin myqty bilim berý ortalyǵy retinde kórsetýde. Munda zııatkerlik mektepter men JOO, álemdik deńgeıdegi bilim ordasy bolyp tabylatyn Nazarbaev Ýnıversıteti jumys isteıdi»,- dedi A.Balaeva óz sózinde.
Budan basqa, qala ákiminiń orynbasary elordanyń damý dınamıkasynan keıbir statıstıkalyq málimetter keltirip ótti.
«Elordada 434 myń adam ekonomıkalyq belsendilik tanytsa, sonyń ishinde 410 myń adam qyzmet etedi, 24 myń adam jumyssyz. 2013 jyldyń ІІ toqsanynyń qorytyndysy boıynsha jumyssyzdyq deńgeıi 5,5% qurasa, 2012 jyly bul kórsetkish 5,7% bolǵan. Árıne, bul jaqsy kórsetkish. Degenmen, osy baǵyttaǵy jumystardy toqtatýǵa bolmaıdy»,- dedi ol.
Kezdesý barysynda qala ákiminiń orynbasary Aıda Balaeva barlyq ózekti taqyryptardy qamtydy: kóshi-qon, densaýlyq saqtaý, bilim jáne ómirdiń basqa da áleýmettik mańyzdy salalaryn.
Otyrys dıalog formasynda jalǵasty. Kásipodaq uıymdarynyń músheleri qala ákiminiń orynbasaryna ózderin mazalaǵan suraqtaryn qoıdy.
Kezdesýdiń negizgi maqsaty - kásipodaqtar aktıvin Astana qalasynyń áleýmettik-ekonomıkalyq damý jaǵdaıymen jáne perspektıvasymen tanystyrý, áleýmettik seriktestikti odan ári damytý, sondaı-aq, kásipodaqtardyń qoǵamdaǵy róli men ornyn nyǵaıtý bolyp tabylady.
Astanada 50 myń adam engen 300-ge jýyq bastapqy kásipodaq uıymy jumys isteıdi. Kásipodaqtar qala ákimdigi, Kásipodaqtar keńesi men Jumys berýshiler odaǵy qol qoıǵan úsh jaqty kelisimniń negizinde memlekettik organdarmen qarym-qatynas ornatady.
