Astana qalasynyń sport basqarmasy Qostanaıǵa gýmanıtarlyq kómek jiberdi
ASTANA. KAZINFORM – Astana qalasynyń Dene shynyqtyrý jáne sport basqarmasynyń qyzmetkerleri men basqarmaǵa qarasty mekeme qyzmetkerleri elimizdiń sý basqan óńirlerindegi jaǵdaıǵa alańdaýshylyq tanytyp, óz kómekterin kórsetýde.
Astana qalasynyń Dene shynyqtyrý jáne sport basqarmasynyń baspasóz qyzmeti málim etkendeı, qatardaǵy azamattardyń uıymshyldyǵynyń arqasynda azyq-túlik, matratstar, osy kúnderi kórpeler, kıim-keshek pen jyly kıim, zardap shekkenderge qajetti zattar jınaldy.
Basqarma basshysy Vasılıı Alekseevıch kúrdeli jaǵdaı kezinde kómek qolyn sozǵan áriptesterimen alǵysyn bildirip, osyndaı ıgi sharalar elordalyq sportshylardyń nazarynan tys qalmaǵanyn tilge tıek etti.
- Búginde elimizdiń birneshe óńirinde tabıǵı apat qaýpi kúsheıip, kóktemgi sý tasqyny bastaldy. Degenmen qazaqstandyq eriktiler qıyndyq kezinde eshqashan shet qalǵan emes. Qazir de kóptegen otandastarymyz sý tasqynynan zardap shekkenderge kómek kórsetip, qol ushyn sozyp jatyr. Halqymyzdyń aýyzbirshiligi men yntymaǵy osyndaı syn saǵattarda kórinetindigi kóńil qýantady. Astana qalasynyń sportshylary qashanda kómek qolyn sozýda. Mine, endi búgin sol izgi isterdiń jalǵasy retinde Astana qalasynyń Dene shynyqtyrý jáne sport basqarmasynyń qyzmetkerleri men basqarmaǵa qarasty mekeme qyzmetkerleriniń atsalysýymen Qostanaı oblysyna gýmanıtarlyq kómek jolǵa shyǵaıyn dep tur. Osyǵan deıin mekeme qyzmetkerleri sý tasqynynan zardap shekkenderge Týrızm ındýstrııasy jáne sportty qoldaý qorymen ashylǵan arnaıy esepshotqa bir kúndik jalaqylaryn aýdarǵan bolatyn. Onymen birge basqarmaǵa qarasty mekeme qyzmetkerleri aldaǵy demalys kúni (senbi, jeksenbi) Aqmola mańaıyndaǵy Kúıgenjar aýylyna baryp kómek kórsetedi. Olar sý tasqyny saldaryn joıý, uıymdastyrý jumystaryna atsalysatyn bolady. Kómek qolyn sozǵan barlyq azamattarǵa, eńbekqor halqymyz ben áriptesterime alǵysymdy bildiremin. Biz sportshylar árqashan halqymyzben birgemiz. Osyndaı el basyna is túsken shaqta bizdiń qýat-kúshimiz myzǵymas birlikte ekendigi mańyzdy – dedi Vasılıı Levıt.
Sondaı-aq, kúni keshe «Rýhanı qoǵam álemi» qoǵamdyq qory jáne «Meıirim» qaıyrymdylyq qory birlesip Aqtóbege 7 tonna gýmanıtarlyq kómek jibergen bolatyn. Sol qoǵamdyq qordyń eriktileriniń ishinde qalalyq sport basqarmasyna qarasty №3 olımpıadalyq rezerviniń balalar men jasóspirimder sport mektebiniń tárbıelenýshileri de atsalysty.
Qazirgi ýaqytta Astana qalasynda gýmanıtarlyq kómekti úılestiretin shtabtar qurylyp, jumys istep jatyr.
Aıta ketelik, sý tasqyny bolǵan ýaqyttan beri Astanadan zardap shekken óńirlerge 900 tonnaǵa jýyq gýmanıtarlyq kómek jiberilgen bolatyn. Ótken demalys kúnderi «Rýhanı qoǵam álemi» qoǵamdyq qory men Astana qalasynyń Aýǵanstandaǵy múgedekter men soǵys ardagerleri odaǵy sý tasqynynan zardap shekkenderge taǵy 12 tonna gýmanıtarlyq kómek berdi.
Aldaǵy ýaqytta Astana qalasynda gýmanıtarlyq kómek jınaý, sý basqan aımaqtarǵa qoldaý kórsetý jumystary óz jalǵasyn tabatyn bolady.
